Galicia defende en Bruxelas a proposta das rexións periféricas para reformar a Política Pesqueira Común

O Goberno galego defendeu este xoves en Bruxelas a defensa da posición común das rexións marítimas europeas sobre a orientación da futura Política Pesqueira Común (PPC).

Así o trasladou durante o debate estratéxico, titulado 'Trazar a reforma da PPC para garantir o futuro da pesca e das comunidades costeiras de Europa', organizado pola Xunta de Galicia en cooperación co Comité Europeo das Rexións (CdR) e a Conferencia de Rexións Periféricas Marítimas (CRPM), que reuniu eurodeputados, representantes de alto nivel da Comisión Europea (DG MARE), líderes políticos rexionais e colectivos profesionais do sector pesqueiro e acuícola europeo.

A conselleira do Mar, Marta Villaverde, presidenta do Grupo de Traballo de Pesca da CRPM, destacou que "a Unión Europea afronta unha etapa decisiva coa avaliación do regulamento vixente, a futura Visión 2040 e a próxima programación financeira", marcos que definirán o modelo de pesca para as próximas décadas.

Así, advertiu de que os obxectivos ambientais son irrenunciables, pero non haberá unha sustentabilidade ecolóxica duradeira se as actividades pesqueiras deixan de ser viables económica e socialmente. Por iso, instou a reequilibrar estes piares para garantir a supervivencia das comunidades litorais, lembrando que Europa non pode aspirar a reforzar a súa autonomía estratéxica mentres incremente a súa dependencia das importacións.

O manifesto de Galicia e da CRPM propón reequilibrar os impactos da PPC para que Bruxelas avalíe as consecuencias socioeconómicas no litoral antes de tomar decisións. Deste xeito, demanda substituír o enfoque punitivo da obriga de desembarque por un modelo pragmático baseado na prevención, a selectividade das artes e a innovación científica.

O documento sitúa a descarbonización da frota como eixe central, esixindo eliminar de urxencia os límites de capacidade de arqueo que, segundo indicou a Xunta, a día de hoxe frean a renovación de buques por outros máis limpos, eficientes e seguros para as tripulacións.

Esta medida, conforme apuntou, acompáñase dunha simplificación normativa que reduza a asfixia burocrática do sector sen comprometer, en ningún caso, a trazabilidade do produto. Finalmente, o texto reclama reforzar a dimensión exterior para garantir unha verdadeira igualdade de condicións (level playing field).

A conselleira defendeu que as importacións de terceiros países cumpran estritamente cos mesmos estándares ambientais, sanitarios e sociais que se lles esixen aos produtores europeos, evitando así asimetrías comerciais desleais.

Pola súa banda, o director xeral de Relacións Exteriores e coa Unión Europea, Jesús Gamallo, lembrou o papel indispensable que xogan as administracións rexionais na gobernanza europea ao sinalar que a súa proximidade coas comunidades costeiras e a súa competencia en desenvolvemento territorial lles outorgan unha posición privilexiada para deseñar e aplicar enfoques integrados que fuxan de visións unilaterais.

Nas súas conclusións, que recolleron as demandas comúns manifestadas polas frotas de España, Francia, Italia e Portugal, Marta Villaverde concluíu cunha mensaxe directa cara ás institucións comunitarias: "As decisións sobre o futuro do mar europeo non se poden construír á marxe de quen vive del", dixo.

No acto, ademais, o eurodeputado do PP Francisco Millán Mon defendeu unha Política Pesqueira Común máis equilibrada, flexible e orientada á competitividade.

Millán Mon sinalou que un dos principais problemas derivados da aplicación da PPC de 2013 é que non logrou manter un equilibrio axeitado entre as tres dimensións da sustentabilidade: a ambiental, a económica e a social. Así, lembrou que, mentres se rexistraron avances na recuperación de numerosas poboacións pesqueiras, a situación económica e social do sector deteriorouse nos últimos anos.

O eurodeputado galego destacou así mesmo a crecente complexidade normativa que afronta o sector pesqueiro europeo e reiterou a súa petición dun paquete de simplificación específico para a pesca que permita reducir cargas burocráticas e mellorar a competitividade do sector. Tamén se referiu á falta de condicións de competencia equitativas entre a frota europea e as frotas de terceiros países.

Por outra banda, insistiu na necesidade de apostar decididamente pola modernización, renovación e descarbonización da frota europea. Para iso, defendeu revisar o concepto de capacidade pesqueira, de maneira que os investimentos destinados a mellorar a eficiencia enerxética, a seguridade e as condicións de habitabilidade dos buques (a chamada "tonelaxe social") non se vexan penalizados polas actuais limitacións regulatorias.