Os veciños da rúa Santa Lucía da Coruña levan case un ano cos accesos pechados
O concello sacou a licitación, polo trámite de urxencia, para a derruba do inmoble que obrigou a pechar a rúa
Nada mudou na rúa Santa Lucía da Coruña desde que no pasado mes de outubro se desprenderon restos da fachada dun inmoble. Pasou case un ano, a rúa segue pechada e a paciencia de veciños e comerciantes, ao límite.
Pechouse a rúa por razóns de seguridade, para evitar riscos ante posibles novos desprendementos. Pero para os veciños a espera está a resultar excesiva e afecta, segundo contan, ao seu día a día.
Ante a falta de resposta dos seus propietarios, que acumulan ata seis expedientes abertos e máis de 16.000 euros en sancións, o Concello acaba de anunciar que de maneira subsidiaria vai acometer a derruba do inmoble.
A obra sae á licitación pola vía de urxencia e conta tamén coa autorización de Patrimonio, pero algúns aínda teñen dúbidas.
En abril houbo unha campaña de recollida de sinaturas para reclamar a urxente reapertura da vía e agora confían en non ter que repetila.
.png)