Teresa Portela, a exconselleira Manuela López Besteiro e a Policía Autonómica, Medallas Pardo Bazán 2025

A deportista olímpica Teresa Portela, a exconselleira de Familia, Muller e Xuventude Manuela López Besteiro e a Unidade de Policía Nacional Adscrita de Galicia recibirán as Medallas Emilia Pardo Bazán 2025, un recoñecemento que outorga a Xunta a persoas e entidades que loitan por unha sociedade máis igualitaria e contra a discriminación por xénero.

O Goberno galego anunciou este venres o galardón, que leva o nome dunha escritora que foi precursora na defensa dos dereitos das mulleres e do feminismo, a través dunha resolución publicada no Diario Oficial de Galicia.

Teresa Portela, que acumula na súa dilatada carreira múltiples medallas europeas e mundiais, entre eles unha prata nos Xogos Olímpicos de Tokyo, recibirá a Medalla Emilia Pardo Bazán por ser un referente consolidado na defensa dos dereitos das mulleres e por dar visibilidade ao deporte feminino.

Pola súa banda, Manuela López Besteiro, conselleira de Familia, Muller e Xuventude entre 1993 e 2002, foi recoñecida polo seu labor fundamental de reivindicación dos dereitos das mulleres, con especial atención á conciliación e á corresponsabilidade como garantía dunha sociedade máis igualitaria.

Mentres tanto, a Unidade de Policía Nacional Adscrita de Galicia (UPA), coñecida tamén como Policía Autonómica, é a encargada de protexer as vítimas de violencia de xénero e forma parte do sistema Viogen. O xurado pretende enxalzar o seu traballo diario acompañando as mulleres tamén no proceso de recuperación.