A incidencia da gripe en Galicia mantense baixa pero con tendencia a aumentar

A semana pasada as consultas por gripe nos centros de saúde incrementáronse en todos os grupos de idade. O andazo chega antes do habitual este ano.

"Xa estamos en onda, xa hai unhas semanas cun adianto con respecto de temporadas anteriores. Estamos aínda nun nivel baixo pero con tendencia ascendente. Os nosos indicadores amósannos que as taxas de consultas en atención primaria están en aumento", explica Marta Piñeiro, a directora do Centro Galego de Control e Prevención de Enfermidades.

"Moitísismos pequenos, moitísimos profes, nótase moito este ano. Moitas substitucións, moita xente de baixa."

"A xente anda máis acatarrada."

"Si noto que hai amigos que enferman. Pero non tomei medidas, porque isto ata que che vén..."

A gripe xa se está a sentir nos hospitais galegos, na última semana ingresaron 223 persoas con gripe confirmada, máis dun millleiro no que vai de temporada. 

"O que estamos a ver aquí en Galicia é sobre todo a variante A H1N1. O noventa por cento dos casos que estamos detectando son desa variante. É unha variante coñecida que adoita ser a que máis abunda." Di a directora do CEGACE

O Ministerio de Sanidade recomenda o uso da máscara de xeito preventivo. En Galicia as medidas de protección xa se activaran hai unhas semanas no inicio da vaga de gripe

"Xa recomendamos o uso da máscara en todos os centros de saúde e sobre todo nos hospitais naquelas áreas onde hai máis susceptibilidade", recorda Marta Piñeiro.

Din os expertos que o maior número de casos podería rexistrarse ás portas do Nadal, aínda que unha porcentaxe alta de vacinación pode influír na evolución da vaga e evitar eses picos de contaxios como aconteceu o ano pasado.