Publicador de contidos

A Garda Civil reconstrúe canda o detido o crime do neno de Lardero

A Garda Civil reconstrúe canda o detido o crime do neno de Lardero

Fixérono en secreto para evitar incidentes cos veciños

G24.gal 30/10/2021 12:21

Axentes da Garda Civil reconstruíron durante catro horas, das 4 da tarde ata as 8 do serán, o crime do neno de Lardero, na Rioxa. O único detido pola morte do rapaz estivo presente para aclarar as circunstancias e como sucederon os feitos na vivenda que ocupaba o home.

Os veciños da zona agardaron no exterior do andar número cinco da rúa Río Liñares, onde se fixo a reconstrución. Os axentes evitaron comunicar a hora á que se ía realizar para evitar calquera incidente coa poboación.

O crime sucedeu o venres. O menor xogaba nun parque e participaba nunha festa de Halloween canda os seus amigos. Ás 20:24 horas a nai chamou a Garda Civil pola desaparición do seu fillo. Varias testemuñas declararon que un home o levou mediante enganos.

O arrestado, Francisco Javier Almeida, xa tratara días atrás de levar outra menor da zona. Unha nai denunciou daquela os feitos ante a Garda Civil. A fotografía que fixo unha nena do home na ventá da vivenda foi determinante á hora de dar con el.

Un veciño encontrou o home que levaba o neno inconsciente nos seus brazos e berraba que se desmaiara. Deseguido apareceu unha patrulla da Garda Civil que o detivo.

O cativo morreu na ambulancia que se desprazou ata o lugar. Houbo mesmo intentos de linchamento do arrestado, que precisou protección policial.

A sociedade rioxana está conmocionada polo asasinato do neno. Francisco Almeida estaba en liberdade condicional desde febreiro de 2020 tras máis de 20 anos no cárcere acusado da agresión sexual a unha nena, unha violación en 1993 e o crime dunha axente inmobiliaria en 1993.

Publicidade
Publicidade
Publicidade