A Garda Civil investiga catro denuncias por roubos en áreas rurais do Deza

No lugar de Palio, en Lalín, contan que os cacos entraron en varias casas nos últimos días. Unha foi a de Juan Pinto. Aquela tarde el saíra co coche facer un recado e, cando volveu despois dunha hora, xa estaba o barrio revolucionado.

"Os meus veciños tiñan os coches fóra, e estaba a Garda Civil, dixeron que lles entraran aí" relata Juan. Máis sorpresa levou cando entrou no seu domicilio: "Estaba todo revolto, leváronme o ouro e os cartos dos netos que tiñan nun peto", di.

Reconstruíndo aquela tarde, lembra que lle chamou a atención ver tres persoas descoñecidas paseando polo lugar. "A primeira vez que pasaron non me estrañou, pero a segunda vez si: nunca os vira por aquí e chamoume a atención". Sospeita deles: cre que vixiaban o lugar porque aproveitaron o momento xusto, cando quedou baleiro. Sen testemuñas, a Garda Civil investiga os feitos. 

"Colleron pegadas pero parece ser que usaron guantes, así que non sei -explica Víctor, o fillo de Juan-. Dixeron que o que é seguro é que entraron os mesmos alí e aquí".

E quizais tamén foron os mesmos os que entraron nunha casa en Regufe. Tamén foi sobre as sete da tarde, e tampouco estaban na casa. Cóntao Amadeo, veciño dos afectados, que di que cacos "fixeron moita desfeita" na vivenda. En Feás, tamén en Lalín, outra afectada cóntanos que librou por pouco: o carpinteiro que traballaba na súa casa espantou tres persoas que xa ían escaleiras arriba.

Despois da operación Loño, que deixou catro detidos e un investigado por atracos na zona, a Garda Civil investiga catro novas denuncias por roubos en vivendas na comarca do Deza.