Detido o presunto autor dun roubo con forza nun establecemento de vending en Cee

A Garda Civil de Corcubión detivo un home, veciño de Muxía, como presunto autor dun delito de roubo con forza perpetrado na localidade de Cee. Ao implicado constábanlle, ademais, dúas sinalizacións xudiciais en vigor de procura, detención e comparecencia diante dos Tribunais de Instancia de Ponferrada e Mondoñedo.

A actuación iniciouse tras a recepción dun aviso o pasado xoves informando de que unha persoa se atopaba forzando as máquinas expendedoras dun establecemento de venda automática.

Ao lugar desprazáronse de inmediato patrullas de servizo, cuxos axentes observaron a un individuo que abandonaba o local co rostro cuberto e portando un caxetín de caudais.

Ao detectar a presenza policial, o sospeitoso emprendeu unha fuxida a pé, desprendéndose do diñeiro subtraído durante a fuga.

Tras un dispositivo de procura nas inmediacións, o autor foi localizado oculto no interior dun galpón situado nunha leira próxima á zona dos feitos.

Como resultado da intervención, recuperáronse 114 euros en moeda fraccionada. Pola súa banda, o titular do establecemento valorou os danos materiais ocasionados na maquinaria en aproximadamente 6.000 euros.

O detido, xunto coas dilixencias instruídas e os efectos recuperados, foi posto ao dispor do Tribunal de Instancia de Corcubión, en funcións de garda.

Imaxe cedida pola Garda Civil