Deteñen un criminal coa axuda de cans, drons e robots: exhibición da Garda Civil ante escolares

Máis aló das coñecidas patrullas de Tráfico ou seguridade cidadá, a Garda Civil ten moitas outras facetas. E todas elas se deron cita este martes no Colexio Otero Pedrayo da Laracha.

"Tentamos ir a sitios onde non é doado que a rapazada vexa especialidades como a policía xudicial, os mergulladores, as patrullas fiscais e de fronteiras, as unidades con cans ou o laboratorio de criminalística", explica Julio González, tenente coronel da Garda Civil na Coruña.

Os axentes máis peludos do corpo acapararon toda a atención da rapazada. Cans adestrados para o rescate de persoas ou a detección dos explosivos que despois desactivan os Tedax.

"Pretendemos que sexa moi interactivo, que pasen polos postos das diferentes especialidades e despois que vexan unha exhibición dinámica sobre como funcionan os cans ou como procedemos a deter un criminal perigoso, e se podemos colgaremos arneses para que vexan un rescate de montaña", engade o tenente.

Unha mañá de acción onde lograron deter un terrorista fuxitivo con axuda de cans, robots e drons. Toda unha despregadura de medios da que mesmo poderían saír futuras vocacións.

"Non é o meu soño, pero creo que estaría ben sobre todo pola parte de axudar á xente", di un rapaz.

"Si me gustaría, pero creo que hai estudar moito", engade outro.

A exhibición abrirase ao público en xeral no horario de tarde, onde todos os que se acheguen poderán facer unha achega solidaria de alimentos para Cáritas da Laracha.