A formación dos auxiliares de voo, os ollos do comandante na cabina do avión

    Entramos en Air Hostess, unha academia de auxiliares de voo en Compostela. Toca clase de primeiros auxilios. Reciben coñecementos básicos e outros que so poden xurdir nun avión.

     A formación corre a cargo de Marcos Lebrero, médico de urxencias e profesor de medicina aeronáutica. Explica que as aspirantes a obter o título saen preparadas para atender e xestionar urxencias menores, pero tamén a saber detectar urxencias maiores que obrigan a contactar con persoal sanitaria e a informar ao comandante para aterrar o avión. 

Tamén lles aprenden supervivencia ou mesmo a atender unha crise de pánico, algo relativamente común polo medo a voar de moita xente. Lebrero explica que do curso teñen que sair capacitadas para falar con esa persoa e tranquilizala. E a poñerlle unha bolsa pechada para que respiren por ela non caso de que empece a hiperventilar.

 Estíbaliz Sánchez, con 20 anos de experiencia como tripulante de cabina, ocúpase das materias máis especificas do curso. Apréndelles desde como actuar nun amaraxe ata a detectar no embarque un pasaxeiro problemático. Conta que ao principio a nivel persoal o máis complicado é adaptarse aos cambios de horario e de presión. Pero que isto se vai superando e no día a día o mellor e o peor da profesión é o trato coa xente. Ás veces vólvese dificil cando deben enfrontarse a un pasaxeiro problemático.  Son os ollos do comandante e deben comunicarlle cando detectan, incluso durante o embarque, que alguén pode resultar un perigo para a navegación ou o resto da pasaxe e a tripulación.

Cada alumna ou alumno ten as súas motivacións para prepararse para esta profesión. Marta Sayáns di que lle encantan os avións desde pequena, estar neles e saber como funcionan. Sara Abdaoui soña con poder traballar en voos longos para coñecer xente e culturas doutros países.

 Nuns días estes soños poden ser realidade. Tras catro meses de formación na academia, farán os exames da Axencia Estatal de Seguridade Aérea para obter o título e ter acceso aos postos de traballo que ofertan as compañías aéreas.