A falta de peixe na dieta trae consecuencias para a súa saúde dos nenos
Nutricionistas advirten de que os nenos deben consumir 3 racións de peixe á semana para un desenvolvemento físico e cognitivo axeitado
Detrás dun baixo rendemento escolar, dun déficit de atención e mesmo dalgúns problemas de vista hai en moitos casos un baixo consumo de peixe
"O peixe sabemos que non é algo que lles adoite entrar polos ollos, entón hai que poñelo apetitoso", di a cociñeira Noelia Calvo.
No colexio público Victor Sáenz de Mazaricos, a cociñeira prepara robaliza á prancha para preto de 70 comensais. De segundo prato, tomarán o peixe acompañado de ensalada.
"Normalmente no menú semanal adoitamos ter peixe os martes e os xoves, e algún día máis arroz mariñeiro, luriñas ou así".
"O que priorizamos é que sexan alimentos frescos e de calidade, por iso a final de curso poucos cartos nos quedan", explica o director do centro, David Fernández.
"Aquí ao ver comer ao do lado comen case todo, cómenos bastante ben, na casa é peor", di Susana Recarei, da Anpa.
Os produtos do mar teñen nutrientes necesarios para o desenvolvemento físico e cognitivo dos cativos.
"Está rica toda a comida". "Gústame o peixe, o pan e o chourizo". "Aquí prepárano rico", valoran os cativos.
Un menú sen os ácidos graxos que achega o peixe, o DHA, terá consecuencias na saúde, segundo os expertos.
"O OMG3 é unha familia de ácidos graxos e dentro dela está o DHA, que é fundamental para o desenvolvemento neuronal dos nenos, ocular, para a vista, para a retina. Estamos vendo que nenos con déficit de DHA teñen problemas de hiperactividade, déficit de atención, problemas no rendemento académico", Carolina Becerra, nutricionista.
"O ideal sería que tomaran tres racións á semana. A ración depende do neno, entre 50 e 70 gramos sería o ideal.", explica.
A nutricionista suxire preparación máis atractivas.
"Unhas albóndegas de peixe, unha lasaña de salmón, uns paus de pescada pode facilitar que os nenos se adapten ao sabor", apunta Carolina.
