A extracción de mexilla atrásase a xaneiro, mentres a marea vermella alcanza o seu "pico" e espérase que mellore

A Consellería do Mar informou que a Comisión do Mexillón acordou este mércores atrasar un mes, ata o 1 de xaneiro de 2026, o inicio da extracción de mexilla ante os datos científicos existentes.

Neste encontro co sector no que estivo a conselleira do Mar, Marta Villaverde, o director do Centro de Investigacións Mariñas (CIMA), Carlos Gabín, achegou os datos biolóxicos, recompilados polo proxecto Apromex, que revela unha escaseza do recurso e un tamaño que recomenda adoptar esta decisión.

Villaverde subliña que esta medida "sae do consenso entre a administración, os científicos e o sector, e vela pola sustentabilidade dun recurso tan importante para Galicia". Remarca que o obxectivo é que o sector sexa capaz de abastecerse coa cantidade de mexilla necesaria.

Tras o encontro, en declaracións a Europa Press, o presidente da organización de produtores Opmega, Ricardo Herbón, explicou que a Consellería lles explicou que o atraso da recollida é "o aconsellable" segundo os seus informes científicos, polo que o sector "é responsable" e "acéptao".

De feito, subliña que o que "lle preocupa realmente" ao sector é que están pechados case todos os polígonos de bateas por un episodio de marea vermella e temen as repercusións ás portas da campaña de Nadal, coas maiores vendas do produto do ano.

Indica que a Xunta lle trasladou ao sector que o episodio de toxina lipofílica (diarreica) "está no pico máis alto", polo que se espera que "a partir de agora" empece a mellorar a situación.

"O produto de todo o ano está sen vender", apunta Herbón, de modo que agora ven "secundaria" a recollida de mexilla, con case todas as 3.600 bateas de Galicia sen estar operativas pola extensión da toxina.