Reabren 14 polígonos de mexillón e tres zonas de marisqueo tras o episodio de marea vermella

O Instituto Tecnolóxico para o Control do Medio Mariño de Galicia (Intecmar) autorizou a reapertura de 14 polígonos de bateas e de tres zonas de marisqueo ao mellorar o episodio de marea vermella que afectou ás rías galegas nos últimos meses.

Nun comunicado, a Consellería do Mar valora esta decisión como "un importante balón de osíxeno" para o sector produtivo marítimo.

Na ría de Arousa, o Intecmar autoriza o regreso á actividade comercial nos polígonos de: Ribeira B e C; A Pobra H, B, C e D; Cambados A2, E, A1, C (Norte) e C (Sur), así como no Grove A.

Na ría de Vigo, recuperan a operatividade os viveiros flotantes de Cangas E e Redondela A e E. Así mesmo, nesta ría retómase as extraccións de moluscos infaunais (ameixas ou berberechos, por exemplo) nas zonas de marisqueo correspondentes aos sectores III.1, III.2 e IV.1.

Esta evolución favorable débese en gran parte ás actuais condicións meteorolóxicas, que facilitan unha rápida renovación das augas nas rías e aceleran o proceso de desintoxicación natural dos propios moluscos.

Actualmente, a metade de todos os polígonos bateeiros da comunidade están de novo abertos e con actividade comercial.

No tocante ao marisqueo, coa apertura da totalidade da ría de Pontevedra, os datos constatan unha recuperación dos areais galegos. Só cinco das 39 zonas mantéñense pechadas na actualidade por precaución sanitaria na comunidade, á vez que se produce unha subministración de bivalvos "con totais garantías de calidade e seguridade alimentaria nos mercados".

Esta evolución positiva tamén se traslada aos polígonos especializados no cultivo de ostra, onde a estabilidade é "case absoluta" con tres das catro zonas operativas no litoral.