A Estrada ofrece o seu amorodo dende o inverno
En Berres producen este saboroso produto a maior parte do ano
O sabor do amorodo da zona dáse pola súa venda de proximidade, o que evita tempos de espera e cámaras de frío que poidan estragar o produto
En Berres, na Estrada, a SAT Río Ulla leva corenta anos traballando as terras, e dende que empezou a cultivar amorodo, non parou de apostar por producir produto de seu. Tal foi o esforzo que xa conseguen subministrar este saboroso manxar mesmo en inverno, de novembro a xullo.
"A fresa no inverno en Galicia non compensa porque produce moi pouquiño, pero como nós temos venda directa a pouquiña que produce ímola vendendo aos poucos", comenta Raquel Touceda, de Río Ulla SAT (Sociedade Agraria de Transformación).
Este ano a produción de amorodo na Estrada non se diferenciou moito do exercicio anterior, agás polo tempo que si condicionou os cultivos.
"Afectou moito o tempo porque cando tiñamos que estar traballando para a vindeira campaña non puidemos porque empezou a chover, e na terra se está chovendo o tractor non entra nas leiras" afirma Raquel Touceda.
Aínda que tiñan previsto sementar corenta mil plantas, o mal tempo impediuno e traballan coa metade para subministrar produto aos mercados da Estrada e a Merca Coruña, onde venden directamente. Ao ser un mercado de proximidade prescinden de cámaras de frío o que garante a calidade e outorga un selo único ao seu amorodo.
"Ti levas este amorodo que está recollido do día anterior, ou do momento, e aguántache perfectamente unha semana se o tratas ben. Non se che estropean como pasa coas de fóra", di a empresaria de Río Ulla.
Esta sociedade estradense vén de acadar un importante recoñecemento ao recibir un dos Premios Mulleres Femupo outorgados hai quince días en Pontevedra. Unha recompensa que chega a todos en forma dun amorodo saboroso e de calidade única.
