A Escola de pastores de Galicia vai comezar a funcionar o mes de marzo en Xinzo de Limia
É unha iniciativa impulsada pola Asociación de criadores de ovino e caprino, co apoio da Consellería do Medio rural, da Deputación de Ourense e da Fundación La Caixa
O seu obxectivo é formar os pastores do século XXI e combater o despoboamento rural
O curso é de balde e terá certificación oficial
A Escola de pastores de Galicia é unha inciativa pioneira coordinada pola Asociación de Criadores de ovino e caprino. Aínda que nace co obxectivo de potenciar este tipo de pastoreo, a escola vai estar aberta a outras ganderías
"A idea é que sexa aberta, que poida vir calquera persoa que queira ter unha explotación extensiva. De feito, temos que seguir respetando a natureza do proxecto da Fundación La Caixa, que é implicar todos os axentes que están na zona, e na zona hai máis que ovellas e cabras. Temos algunha cooperativa de vacas en extensivo que se interesou polo proxecto, e non lle imos pechar as portas", asegura Cristina Díaz, técnica de Avica, a Asociación de Criadores de Ovino e Caprino de Galicia.
A escola de pastoreo abrangue 19 concellos da provincia de Ourense. O curso é de balde e terá certificación oficial. Os obxecivos da escola son dous: modernizar o oficio do pastoreo e combater o despoboamento do rural.
"Ten un obxectivo fundamental: frear o despoboamento no mundo rural, traballando especialmente con xente nova e con mulleres", explica Alfredo Azabal, representante da Fundación La Caixa.
"Temos a tecnoloxía necesaria para actualizar o sector. Queremos formar os pastores do século XXI", explica Cristina Díaz, técnica de Avica, a Asociación de Criadores de Ovino e Caprino de Galicia.
A escola vai comezar as súas actividades a mediados de marzo e ofrecerá formación durante catro meses. As prácticas de pastoreo comezarán a partir de setembro. As solicitudes xa están abertas.
