O sector eólico reclama un marco estable e pide executar as sentenzas para desbloquear 2.800 MW en Galicia

O sector eólico pediu este mércores un marco regulatorio estable e con interpretacións xurídicas únicas e coherentes que ofrezan seguridade aos investimentos, así como mecanismos de coordinación entre administracións que permitan reducir os tempos de tramitación dos proxectos.

Na inauguración da xornada de Análise Operativa de Parques Eólicos, organizada pola Asociación Empresarial Eólica (AEE), a presidenta da patronal, Rocío Sicre, advertiu de que os novos proxectos se enfrontan a prazos de autorización excesivamente longos que comprometen o cumprimento dos obxectivos de crecemento.

Sicre subliñou a necesidade de aplicar o concepto de interese público superior aos proxectos eólicos e reclamou a execución das sentenzas do Tribunal de Xustiza da UE e do Tribunal Supremo a favor da tramitación realizada pola Xunta, o que permitiría desbloquear máis de 2.800 megawatts, equivalentes a máis de 3.500 millóns de euros de investimentos paralizados polo TSXG desde hai tres anos.

Un sector clave fronte aos retos globais

A presidenta da AEE destacou que a eólica representa en España máis de 32 xigawatts instalados, que achegan arredor do 23 % da electricidade consumida, sendo a primeira tecnoloxía do mix enerxético.

Tamén puxo en valor a cadea de valor que xera o sector, aínda que advertiu dos desafíos globais, como a presión da industria chinesa con custos baixos ou a guerra comercial de aranceis entre mercados estratéxicos como Estados Unidos.

“Estes factores poñen a proba a resiliencia do noso tecido industrial, onde a operación dos parques eólicos é decisiva para manter activa a cadea de valor, xerar novas oportunidades e defender un modelo industrial forte, competitivo e sustentable”, afirmou.

Sicre advertiu tamén de que a repotenciación dos parques, que permite aumentar a produción cun menor impacto ambiental e territorial, non está a ir "ao ritmo que debería”.

Asegurou que este proceso se enfronta a un procedemento administrativo incluso máis complexo que o dun parque novo, con múltiples riscos e resultados incertos.

Neste sentido, reclamou ferramentas regulatorias que fagan posible un ritmo axeitado de repotenciación, cun enfoque diferenciado en termos ambientais e asumindo a realidade económica e contable destas instalacións.