A Coruña segue de festa tras o ascenso do Dépor á Primeira División

A Coruña amenceu este luns cunha mestura de euforia e esgotamento, e algún mesmo quedou afónico.

"Porque a noite moi longa". "Houbo moita festa".

As conversas nas terrazas e na rúa seguen centradas no partido co que o Dépor acadou o ascenso á máxima categoría do fútbol español... e moitos continúan lucindo as camisetas.

"Con moito orgullo".

E os que aínda non a tiñan non dubidaron en achegarse á Depor Tenda para mercar unha delas.

"Unha camiseta ou algo para lembrar este momento". "Eu veño por unha camiseta para o meu sobriño... porque lle fai ilusión".

Contra a unha desta tarde os xogadores facían a súa primeira aparición no Espazo Avenida de Abanca, tras a longa noite de celebración.

E a festa vai continuar esta tarde aquí, en María Pita, onde os seareiros branquiazuis volverán a xuntarse porque, contra as sete, os xogadores sairán ao balcón do Concello para compartir este momento do ascenso do equipo a Primeira División cos milleiros de afeccionados.

Unha celebración na que a propia María Pita, vestida coa camiseta do Dépor e portando a bandeira do equipo, se converterá tamén en protagonista e testemuña desta xornada que promete volver a tinguir o centro da cidade de azul e branco.

"Eu sigo de festa". "E o domingo haberá que ir a Catro Camiños".

Porque o próximo domingo, tras o último partido do Dépor contra As Palmas, haberá outra celebración, desta volta cos xogadores, na contorna da fonte de Catro Camiños.