Detido en Sanxenxo tras facerse pasar por directivo dunha petroleira para estafar 350.000 euros

O Equipo de Policía Xudicial da Garda Civil de Cangas do Morrazo detivo en Sanxenxo un home de 72 anos por intentar estafar 350.000 euros a unha empresa facéndose pasar por director xeral dunha petroleira con sede en México.

Segundo informou o Instituto Armado nun comunicado, a investigación comezou tras unha denuncia recibida o 8 de xuño nas dependencias da Garda Civil de Cangas por parte dunha empresa coa que contactou o home para realizar unha operación entre a súa suposta empresa e a entidade obxectivo da estafa.

O home fíxose pasar por director xeral dunha coñecida petroleira con sede en México e reclamou o pagamento de 350.000 euros en concepto de comisións, gastos e taxas. Para iso, empregou documentación falsa con selos da empresa e dun notario de México, así como documentación dunha terceira persoa coa que el mesmo se identificaba.

Os axentes identificaron o varón e detivérono como presunto autor dun delito de estafa en grao de tentativa, un delito de usurpación de identidade e un delito de falsificación de documento.

O home pasou a disposición xudicial do xulgado número dous de Marín, que decretou a súa posta en liberdade.