Villares: "O obxectivo é a permanencia, chegar canto antes a eses 42 ou 43 puntos"

O capitán do Deportivo, Diego Villares, apuntou este mércores que a pretemporada está a ser “máis ilusionante” que as últimas porque neste curso ligueiro volverán a Primeira División, oito anos despois, e incidiu en que "o obxectivo é a permanencia" e "chegar canto antes a eses 42 ou 43 puntos".

“Vexo á xente moi ilusionada con este regreso a Primeira. O noso obxectivo será parecido a cando ascendemos a Segunda o primeiro ano, chegar canto antes a eses 42 ou 43 puntos que che dan a salvación. A partir de aí, xa se verán outras cousas”, manifestou en rolda de prensa.

O centrocampista lembrou que deu o salto ao primeiro equipo estando en Segunda División B e agora cumprirá o seu “soño” de xogar na máxima categoría coa camiseta deportivista. Preguntado pola súa recente ampliación de contrato ata xuño de 2028, Villares sinalou que ese sempre foi o seu desexo, por iso foi “doado” chegar a un acordo co club.

“Sempre houbo entendemento. Desde o primeiro momento eu xa deixara claro cal era a miña intención, e o club tamén me trasladou. Como todas as renovacións houbo meses de contacto, pero ao final chegamos a un acordo facilmente”, indicou.

O capitán do Dépor dixo que a chegada do porteiro internacional español Leo Román, o defensa polaco Bright Ede e o centrocampista holandés Teun Gijselhart, aos que ve “moi ilusionados”, achegará “enerxía nova” ao vestiario branquiazul.