"Estudamos medidas legais": os afeccionados do Dépor, en pé de guerra pola renovación de abonos
Critican unha suba do 40 % de media no prezo dos abonos e chaman a manifestarse a vindeira semana
O club respondeu nun comunicado que vai abrir un período de negociación coas peñas
Afeccionados do Deportivo da Coruña concentráronse na Torre de Maratón de Riazor para celebrar unha asemblea aberta en protesta polas condicións de renovación dos abonos. Entre outras cousas, critican unha suba dun 40 % de media nos prezos.
Os seareiros da bancada de Maratón inferior protestan tamén polos novos requisitos de acceso, que inclúen unha acreditación mediante DNI e a renovación presencial do abono. Ademais, consideran unha liña vermella o control que o club quere exercer sobre pancartas e cánticos nesta bancada, onde se sitúan os Riazor Blues, Old Faces e outros 4.000 afeccionados.
Ameazan con non renovar os abonos se non hai unha rectificación e incluso estudan medidas legais. Ademais, chaman a manifestarse a vindeira semana.
O club pola súa parte sacou un comunicado como resposta ao malestar existente entre os seareiros.
➡️ Comunicado oficial do RC Deportivo.
— RC Deportivo (@RCDeportivo) July 10, 2026
ℹ️ https://t.co/8Gbl5duTX5 pic.twitter.com/xmdHQC5yW1
O club responde que non se procederá á prórroga automática do convenio de colaboración vixente dende o 2017. O Deportivo anuncia que vai tratar cos peñistas aspectos como as entradas para os partidos como visitante ou os mecanismos de prevención contra incidentes e cánticos ofensivos. O club insiste en que afronta este proceso con vontade de diálogo e escoita cos seus afeccionados.
