A Coruña celebra unha nova edición do Día da Ciencia na Rúa

O parque de Santa Margarida da Coruña acolleu este sábado unha nova edición do Día da Ciencia na Rúa.

Escolares de 48 centros educativos, case todos da provincia, tiveron a oportunidade de mostrar as actividades e experiencias que prepararon durante meses para convidar a cidadanía a descubrir, aprender e xogar coa ciencia e a tecnoloxía. 

Durante todo o día, alumnos e alumnas presentáronlle ao público os seus proxectos, nunha romaría científica que xa é un clásico da primavera coruñesa.

Ademais, houbo diferentes actividades paralelas e os museos científicos foron de balde durante toda a xornada.