A comisión de investigación apunta á rotura dunha soldadura como causa principal do accidente de tren de Adamuz

O presidente da Comisión de Investigación de Accidentes Ferroviarios (CIAF), Ignacio Barrón, asegurou este luns que a "causa principal" do descarrilamento do tren Iryo en Adamuz, en Córdoba, foi a rotura dunha soldadura.

Nunha entrevista realizada este luns polo Colexio de Enxeñeiros de Camiños, Canles e Portos, Barrón asegurou: "Todo parece evidenciar que a causa principal foi a rotura non tanto do carril como dunha soldadura".

Ao seu xuízo, "xuntar dous carrís de épocas distintas en principio non é causa de ningún tipo de anormalidade, sempre que se teña en conta, sempre que saia ben".

"Hai unha serie de criterios para renovar os carrís. A min persoalmente non me sorprende que siga habendo carrís do ano 1989 sempre que estean en bo estado, claro", di Barrón. Cando a Comisión saiba cal foi a causa da rotura que produciu o descarrilamento "imos ver por que estaba así esa soldadura, como se podía detectar...".

"A investigación vai ir moito máis alá de dicir: esta foi a causa", explicou.

Barrón móstrase "plenamente convencido de que imos chegar ao fondo, non só de saber que rompeu, senón por que e como se podía evitar", e cre que esta semana empezarán a ter "probas máis contundentes".

Por que se renovaron algúns tramos de vía e outros non

Ademais, a CIAF preguntará ao xestor das infraestruturas ferroviarias, ADIF, por que se renovou a liña Madrid-Sevilla "nuns tramos si e noutros non".

"Todos criamos que se fixera unha renovación integral", asegurou. Ignacio Barrón precisou que o que se renovou son "desvíos que presentaban problemas que poderían ser críticos, e algún elemento máis de carrilaxe", polo que preguntarán cales foron os criterios para esta selección.

Barrón precisou que a CIAF "non ten por misión establecer culpabilidades, senón que é unha máquina de aprender".

O presidente da Comisión cre que a distancia entre as vías debería ser de cinco metros, máis ampla que a actual. Na liña Madrid-Sevilla, que é antiga, a separación é de 4,3 metros, como tiñan as francesas daquela.

"Somos un pouco tacaños neste sentido", admitiu. Por iso, poderían recomendar que nos trazados de novas liñas a separación entre eixes de vías "sexa maior".

Explicou ademais que no Xapón os 'bogies' (a transmisión do tren) teñen "unha especie de lingueta" que no caso de saír despedido choca contra o carril e evita que se desprace a outros lugares.

Finalmente, explicou que o ministro de Transportes, Óscar Puente, lle dixo: "Es completamente libre de dicir o que queiras, ti e a túa comisión sodes totalmente independentes". "Non tivemos ningún tipo de inxerencia nin de suxestión, nin de observación", puntualizou.