A burocracia tamén encarece, por María Bastida

Regular é necesario. Controlar a rastrexabilidade do peixe, combater a pesca ilegal e garantir que o que entra no mercado europeo cumpre as normas é imprescindible. Pero a forma en que se deseñou -ou non se planificou suficientemente- esta regulación está a xerar sobrecargas administrativas e custos engadidos que tensionan empresas que, precisamente, cumpren coa normativa. E é que cando un trámite provoca demoras de entre 6 e 25 días, sobrecustos de 3.000 euros por contedor e unha caída superior ao 25 % nas importacións de peixe conxelado e conservas, xa non estamos a falar de papelada. Estamos a falar de competitividade, marxes, abastecemento e emprego.

A burocracia non é neutra. Pode dar seguridade xurídica ou crear incerteza. Pode protexer un mercado ou facelo menos competitivo. Pode ordenar unha actividade ou bloqueala. En sectores como o pesqueiro, onde os tempos, a cadea de frío, a loxística portuaria e a planificación comercial son fundamentais, un atraso administrativo é custo directo, perda de marxe, risco contractual e, nalgúns casos, mercancía inmobilizada. E este problema, ademais, é especialmente relevante para Galicia. Non falamos dun sector marxinal, senón dunha cadea económica estratéxica. Se un sistema europeo encarece a entrada de materia prima, atrasa operacións ou desvía tráficos cara a outros portos e mercados, o impacto trasládase rapidamente ás empresas, aos traballadores, aos clientes e ao conxunto do tecido produtivo.

Convén insistir en que pedir axilidade administrativa non significa pedir menos control. Significa pedir mellor xestión. A rastrexabilidade non pode ser unha coartada para multiplicar trámites inútiles. A dixitalización non pode consistir en trasladar ao operador privado a carga de alimentar manualmente sistemas incompletos. E a loita contra a pesca ilegal non pode acabar castigando a quen traballa dentro da legalidade.

A mesma Galicia que necesita atraer unha fábrica de coches eléctricos necesita tamén que Europa non asfixie con trámites mal deseñados sectores onde xa somos fortes, como o pesqueiro, o conserveiro ou o loxístico. Porque tan importante como atraer nova industria é non poñerlle pedras no camiño á industria que xa temos.