A borrasca Nelson mantén en alerta Andalucía, Murcia e as Baleares
A borrasca Nelson mantén en alerta Andalucía, Murcia e as Baleares
Hai unha trintena de estradas afectadas pola chuvia ou a neve en Andalucía
En Guadalaxara, Toledo e Cidade Real seguen con preocupación o nivel de moitos ríos
En Zaragoza, o concello activou o Plan de Emerxencias Municipal ante a enchente do río Gállego ao seu paso pola cidade
O aviso amarelo por chuvia e vento está a afectar especialmente no litoral de Andalucía, en Murcia e nas Baleares. A neve cae con forza en zonas altas de Castela e León, Madrid, Picos de Europa e no Pireneo.
A borrasca Nelson deixa inundacións e unha trintena de estradas afectadas pola chuvia ou a neve en Andalucía. As precipitacións deixaron acumulados ata 90 litros por metro cadrado nas últimas 24 horas en diferentes provincias do litoral andaluz.
En zonas de Sevilla, Córdoba e Granada este sábado era difícil desprazarse. Varias estradas permanecen cortadas ao tráfico total ou parcialmente. En Sevilla e Córdoba, a causa das restricións de tráfico son as inundacións; en Granada o corte de estradas prodúcese pola acumulación de neve.
En Huelva, a auga corre con forza polos ríos da provincia, auga moi ben recibida polo sector agrario que soporta restricións para o regadío.
En Guadalaxara, Toledo e Cidade Real seguían con preocupación o nivel de moitos ríos. Tamén en Zaragoza, onde o concello activou o Plan de Emerxencias Municipal ante a enchente do río Gállego ao seu paso pola cidade.
Forte vento
O vento dificulta tamén a situación meteorolóxica sopra especialmente forte na zona do Estreito, con refachos de 80 quilómetros por hora, así como en Almería, Murcia, Formentera, Eivisa e Mallorca, con refachos de 70.
Segundo a previsión da AEMET, Nelson seguirá a afectar á península e Baleares durante o domingo, co paso de novas frontes atlánticas que deixarán precipitacións xeneralizaras.
A cota de neve situarase entre os 900 e os 1400 metros, polo que se esperan nevaradas nos principais sistemas montañosos. O vento do suroeste soprará moi forte de novo no extremo sur, serras da metade oriental e as Baleares.
