Ratifican a "privación total da patria potestade" ao asasino de Ana Enjamio

A sección sexta da Audiencia Provincial de Pontevedra ratificou a sentenza de instancia que acordou a "privación total da patria potestade" sobre os seus fillos a César Adrio, condenado a máis de 30 anos de prisión e catro meses polo delito de asasinato en Vigo da moza enxeñeira Ana Enjamio, na madrugada do 17 de decembro de 2016.

Un xulgado de primeira instancia xa acordara privar deste dereito a César Adrio por "incumprimento grave" dos seus deberes, ao non atender ao sustento dos seus fillos, ao ser condenado por un delito grave, e tendo en conta o superior interese dos menores, un deles expresou explicitamente o seu rexeitamento a manter calquera relación co seu pai.

A defensa de Adrio presentou un recurso

A representación xurídica de César Adrio presentou recurso, alegando que non podía colaborar na manutención dos seus fillos, fixada na sentenza de divorcio, porque estaba en prisión, e que a privación da patria potestade supón un "novo castigo" para el, que xa está a cumprir condena polo asasinato.

A Audiencia confirmou a sentenza nunha resolución de maio pasado, ao considerar que o condenado non fixo "nin un só intento de colaborar no sustento económico" dos seus fillos, nin sequera cando a sentenza foi firme e puido desenvolver algún traballo remunerado en prisión. Ademais, "non acreditou que careza de recursos".

"Quen actúa así non está en condicións de velar polos seus fillos", di a sentenza

A sentenza tamén fai fincapé na gravidade dos feitos polos que foi condenado a prisión, tras asasinar a unha muller nova, coa que tivera unha relación sentimental, e á que "estivo fustrigando durante meses". "Quen actúa así non está en condicións de velar polos seus fillos, nin de proporcionarlles unha formación aceptable", afirma.