A área sanitaria de Vigo lidera o número de infeccións activas

Volven as ringleiras ao covid-auto do hospital Álvaro Cunqueiro de Vigo. E segue aumentando o número de infectados nesta área sanitaria. Actualmente hai un total de 1.202 casos activos, a máis alta de toda Galicia. Falamos cun dos enfermeiros do covid-auto do Cunqueiro, Leo Pérez.

Sobre todo agora o que estamos notando é un maior número de nenos menores de dez anos, pero tamén persoal de residencias e persoas que teñen que someterse a unha operación cirúrxica.

Nas últimas 24 horas sumáronse 169 novos positivos. Os menores de doce anos, aínda sen vacinar, son os que máis preocupan. Pero os contaxios tamén se producen, anque de forma leve, entre os vacinados.

Preocupa o incremento diario nesta área que aumentou considerablemento o número de probas diagnósticas. Non só neste covid-auto, tamén no punto móbil do Naútico de Vigo onde se realizan cribados. Este sábado,  levaranse a cabo arredor de 1.000 probas. 

O que se mantén estable é o número de hospitalizados nesta área. Son un total de 22 en planta e dous en coidados intensivos.