A afluencia no Camiño Portugués medra un 14 %

A portuguesa é a vía de peregrinación que máis medra, e a tendencia semella non ter parada.

Cada vez son máis os que deciden arrincar en Lisboa, O Porto ou Tui a súa aventura a Compostela. E cada vez chegan desde máis lonxe.

Aínda non chegou o forte, e xa son 54.000 os camiñantes que optaron por esta ruta. E iso nótase nos albergues, sobre todo onde conflúen cos peregrinos do Camiño da Costa, entre A Guarda e Vigo.

A oferta hostaleira foi medrando en paralelo a este boom, pero a maioría reserva con antelación por medo a quedar sen cama.

Moitos xa fixeron outros camiños antes ou recuncan neste, porque a experiencia, aseguran, paga a pena.