Rueda destaca que o Camiño Portugués da Costa é o que máis medra
79.000 peregrinos desa ruta recolleron a Compostela no que vai de ano, o que supón un 25 % máis que no 2025
Alfonso Rueda resaltou tamén que esta ruta é un bo exemplo da desestacionalización e da internacionalización do Camiño de Santiago
O presidente da Xunta, Alfonso Rueda, destaca que o Camiño Portugués da Costa é a ruta xacobea que máis medra, con 79.000 peregrinos que recolleron a Compostela no que vai de ano, o que supón un 25 % máis que no 2025.
Díxoo tras recibir en Baiona a Medalla ao Mérito do Camiño Portugués da Costa, no nome da Xunta, coa que o Concello recoñece o traballo realizado polo Goberno autonómico para oficializar esta ruta no 2016, así como os investimentos en sinalización, conservación e promoción.
Hai unha década escolleron esta ruta, que atravesa A Guarda, Oia, Baiona e Vigo ata unirse en Redondela co Portugués interior, 2.600 peregrinos. No 2025 foron 90.000 e no que levamos de ano máis de 79.000, o que apunta a que seguirá batendo marcas. Oito de cada dez son estranxeiros, principalmente dos Estados Unidos.
Alfonso Rueda resaltou tamén que esta ruta é un bo exemplo da desestacionalización e da internacionalización do Camiño de Santiago. A gran maioría dos peregrinos que elixe este itinerario realiza o percorrido fóra da temporada alta, nos meses de maio, xuño, xuño, setembro e outubro.
O presidente galego agradeceu os que traballan cada día para consolidar e protexer esta ruta, na que a Xunta leva investidos 6,6 millóns dende o 2016.
