Pídenlle 12 anos por maltrato a súa parella: "Eu non sabía que facía mal, botábame a culpa a min mesma"

 A sección cuarta da Audiencia Provincial de Pontevedra acolleu este xoves o inicio dunha vista contra un home acusado de varios delitos de malos tratos no ámbito da violencia de xénero e para quen a Fiscalía solicita penas que suman 12 anos e 7 meses de prisión.

A súa exparella, que exerce a acusación particular como denunciante, declarou ante o tribunal que os insultos e agresións físicas eran constantes e que tardou en denuncialo porque lle tiña "moitísimo medo".

Así, na sesión celebrada este xoves, declarou a muller prexudicada, que mantivo unha relación de algo menos dun ano co acusado, e que confirmou ante a sala que os insultos por parte do home eran moi habituais, "practicamente todos os días". Tamén relatou que, tres meses despois de iniciar esa relación, comezaron as agresións físicas, tanto nos domicilios que compartiron como na rúa.

"Eu non sabía que facía mal para que me tratase así, botábame a culpa a min mesma", explicou,

Detallou varios episodios de golpes, agarróns, labazadas e empuxóns. Igualmente, explicou que o acusado lle controlaba o teléfono, non a deixa saír soa e mesmo aparecía nos sitios onde ela quedaba cos seus amigos.

No verán de 2024, produciuse unha discusión entre ambos nun local de Pontevedra, e o home, segundo o relato da testemuña, encerrouna no baño do establecemento, ata que unha camareira refuxiouna tras a barra.

"Volvíase tolo de súpeto por calquera cousa, eu tiña pavor, por exemplo, de que me soase o móbil", declarou. 

Confirmou ademais que era frecuente que o acusado a mantivese "encerrada" varios días.

Despois dese episodio, producíronse varias agresións máis, nunha das cales a muller acabou cunha brecha na cabeza, e noutra ocasión, o home supostamente golpeouna contra o chan, provocándolle a rotura dunha peza dental.

Aínda que ata ese momento non acudira aos servizos médicos "por medo" nin denunciara os feitos (interpuxo unha denuncia anterior, pero acabou retirándoa), despois desa última malleira a muller acudiu á Comisaría e rompeu a relación con el.

A testemuña relatou que o procesado era consumidor de drogas e que as agresións se producían cando el consumía, aínda que "non sempre". Do mesmo xeito, recoñeceu que ela tamén tomaba estupefacientes, aínda que en menor cantidade, pero remarcou que "ás veces" se drogaba "para aguantar as malleiras e golpes".

Este xoves tamén prestou declaración a filla da denunciante, que confirmou que a súa nai lle contara os episodios de violencia, enviado fotos das lesións e que ela mesma vira "os negróns e o dente roto". Segundo indicou, a muller non se atrevía a denunciar porque lle tiña moito medo á súa parella.

O xuízo continuará o próximo 22 de setembro, despois de ser suspendido pola incomparecencia de dúas testemuñas. Nesa xornada está prevista tamén a declaración do acusado, que pediu declarar tras a práctica do resto da proba.

Delitos e penas

A Fiscalía considera ao acusado autor dun delito de malos tratos habituais no ámbito da violencia de xénero, catro delitos de malos tratos físicos no ámbito da violencia de xénero e un delito de lesións cualificadas con deformidade (coas agravantes de parentesco e xénero).

Por iso, pide para el penas que suman 12 anos e 7 meses de prisión, prohibición de portar armas durante 17 anos, e prohibición de achegarse ou comunicarse coa muller durante 24 anos.