A afección polos bonsais medra en Galicia grazas ao traballo de asociacións e profesionais

Os bonsais son moito máis que simples plantas. Representan auténticas obras de arte vivas que unen beleza, técnica e unha conexión especial coa natureza. Galicia conta con destacados expertos pero cada vez hai máis talentos emerxentes e niso teñen moito que ver as asociacións que imparten cursos e talleres de formación. Unha arte milenaria que cada vez atrapa a máis afeccionados.

O bonsai naceu na China como un símbolo da eternidade, pero foron os xaponeses os que levaron as técnicas do cultivo e deseño ao máximo nivel de refinamento con grandes doses de constancia e de paciencia. Diso sabe moito José Freire, un dos mellores afeccionados de Galicia, que dese xeito logrou un xardín ben fermoso.

José Freire organiza a exposición da camelia de Padrón e quixo sumar outras especies. Luis Baliño é un dos maiores expositores de España e colaborou levando algúns bonsais. Ese foi o xerme para entrar neste mundo que tanto engancha.

O bonsai é 95 % de agricultura e 5 % de arte porque o prioritario é que sexa unha árbore sa, e cos coñecementos e técnicas axeitadas, pódense crear verdadeiras marabillas arredor dun concepto fundamental: a harmonía. 

Por iso é tan importante o traballo das asociacións que imparten cursos para adquirir os primeiros coñecementos ao igual que os talleres que organiza Alberto Baleato, seguramente o maior profesional de Galicia.

Galicia xa celebrou diferentes congresos con participantes de moitos sitios de España e doutros países que son unha peza clave para compartir coñecementos e aprendizaxes á vez que logran poñer a Galicia no mapa europeo dos bonsais.