Publicador de contidos

Publicador de contidos

Segunda noite da acampada pola vivenda na praza do Obradoiro, onde convive con peregrinos e turistas

Segunda noite da acampada pola vivenda na praza do Obradoiro, onde convive con peregrinos e turistas

Nos días pasados un grupo de mozos establecérase nos exteriores da estación intermodal compostelá no marco das protestas que se están realizando en todo o Estado

"Non queremos causar perturbación ao espazo, senón visibilidade", aseguraron os acampados, que pretenden estar no Obrdoiro de xeito indefinido 

Imaxe directo: cámara web da CSAG na praza do Obradoiro
G24.gal 01/10/2026 10:26 Última actualización 01/10/2026 12:56

A acampada pola vivenda encara a súa segunda noite na praza do Obradoiro, en Santiago, onde as tendas de campaña e as pancartas dos manifestantes conviven con peregrinos e turistas que chegan ao epicentro da capital galega.

Na tarde deste xoves, miles de visitantes pasaron pola emblemática praza, unha imaxe que contrasta cos mozos que, convocados polo Sindicato de Vivenda de Santiago, se instalaron a pasada noite para "loitar por unha vivenda digna".

'Tourist go home'

Entre a decena de tendas de campaña os manifestantes colocaron pancartas nas que se poden ler mensaxes como 'Tourist go home' ou 'A túa Airbnb era a miña casa'. Os participantes iniciaron a acampada durante a madrugada deste xoves e a súa intención, segundo trasladaron, é mantela de xeito "indefinido".

Na mañá deste xoves, o portavoz do Sindicato Vivenda de Compostela, Daniel, explicou, en declaracións aos medios, que axentes da Policía Nacional "identificaron a varias persoas" -unha por tenda- como responsables ante o que "poida suceder".

"Estamos aquí en apoio a Maricarmen, a todas as persoas desafiuzadas, en repulsa de especuladores, fondos voitre e de investimento que converten ás nosas cidades en meros parques de atracción e en material para especular", sinalou.

Os acampados tamén reclamaron a aprobación dos dous decretos presentados polo Goberno central, que se debaten este venres no Congreso dos Deputados. Aínda que para eles as medidas expostas son "insuficientes", a probación dos decretos suporá o "primeirísimo paso" para facer fronte á problemática da vivenda.

"Sabemos que hai que seguir adiante e imos reclamar máis a todas as institucións, ao Concello, á Xunta, ao Estado, á Unión Europea. En definitiva, a quen faga falta", afirmou.

Así mesmo, aseguraron que non queren causar "a máis mínima perturbación ao espazo" e que o seu obxectivo é ter visibilidade. O portavoz do Sindicato tamén indicou que recibiron a visita da alcaldesa de Santiago, Goretti Sanmartín, que lles trasladou "o seu apoio".

Nos días pasados, tras a manifestación que percorreu a cidade o luns, varios mozos improvisaron unha sentada na estación intermodal de Santiago, para logo pasar a instalarse nos exteriores de maneira máis permanente.

Segundo explicaron, a decisión de facer unha acampada no Obradoiro pretende "aproveitar a forza que deu o desafiuzamento de Maricarmen para intentar conseguir unha vida máis digna".

O PP de Santiago pide o desaloxo

Ante isto, o concelleiro do PP de Santiago Adrián Villa pediu, a través dunha mensaxe publicada no seu perfil da rede social X, o desaloxo dos mozos acampados.

"Canto vai tardar o goberno do BNG en enviar á Policía Local para desaloxar os manifestantes da praza do Obradoiro? Ou a prohibición de acampar nun lugar protexido por Patrimonio é selectiva?", di na publicación.

Pola súa banda, a secretaria xeral do PPdeG, Paula Prado, ironizou con que "a solución habitacional pola que será lembrado (Pedro) Sánchez é a construción de campamentos". "O campamento de Sol e os campamentos de Ceuta", engadiu.

Prado sinalou que supón que o BNG "estará a axudar alí na construción do campamento que ten montado debaixo do seu despacho" a alcaldesa de Santiago, a nacionalista Goretti Sanmartín.

O BNG insta á Xunta a "exercer as súas competencias"

Fronte a estas críticas, o viceportavoz parlamentario do BNG, Olalla Rodil, defendeu as acampadas pola vivenda e reivindicou "o dereito de manifestación e o dereito de concentración da cidadanía".

Rodil instou ao PP e á Xunta a "escoitar" e a "exercer as súas competencias" en materia de vivenda e puxo en valor o papel dos movementos sociais, que, segundo destacou, conseguiron "nas últimas semanas poñer no centro do debate político" o dereito a unha vivenda digna.

O PSdeG defende a acampada

O deputado e portavoz da Executiva do PSdeG, Julio Torrado, defendeu "a liberdade" e "o dereito" dos cidadáns para protestar pola situación da vivenda pola vía da acampada e manifestou o seu desexo de que os manifestantes sexan "escoitados" por quen ten que votar no Congreso o decreto estatal de vivenda.

"Espero que o escoiten os que teñen que votar un decreto no Congreso e que lles gusta falar do Obradoiro só cando hai algún tipo de celebracións. Debe ser que esta non lles convence", sinalou.

Publicidade
Publicidade
Publicidade
Publicidade