25 detidos, 4 deles funcionarios, por unha fraude millonaria con prestacións do paro

A Policía Nacional detivo 25 persoas, entre elas catro funcionarios -un do Servizo Público de Emprego Estatal (SEPE) e tres da Comunidade de Madrid- e catro empregados de entidades bancarias, por supostamente defraudar máis de catro millóns de euros á Seguridade Social coa capitalización de prestacións de desemprego.

A rede, desarticulada en Madrid a pasada semana, tramitou máis de 400 expedientes ilícitos entre 2020 e 2024 dirixidos ao SEPE, informou a Dirección Xeral da Policía.

Segundo o cálculo dos investigadores, dos catro millóns estafados, os membros da organización percibirían entre un millón e 1,5 millóns de euros de beneficio.

A bautizada como operación Seos arrincou en decembro de 2022 despois de que os axentes descubrisen irregularidades na actividade de diversos traballadores dedicados a tramitar prestacións do paro, que accedían de forma inxustificada a determinados expedientes de capitalización da prestación por desemprego.

Esta, lembra a Policía, é unha medida que permite que os perceptores da axuda poidan destinala a sufragar os gastos necesarios para constituírense como traballadores por conta propia.

A trama estaba integrada por funcionarios, empregados de banca e xestores administrativos

Avanzadas as pescudas, os axentes descubriron unha trama organizada en cinco elos e do que formaban parte funcionarios dos servizos de emprego público, empregados de banca e xestores administrativos, entre outros.

Dous homes encabezaban a trama e captaban e contactaban aos clientes, a quen dirixían ata unha xestoría do distrito madrileño de La Latina, onde formalizaban os documentos necesarios para pedir as axudas, principalmente para adquirir vehículos ou material informático que debían servirlles para traballar por conta propia.

Diso encargábanse os responsables e traballadores desta empresa, que acreditaban esas compras con facturas falsas, actuando en conivencia con outros dous homes, un dedicado ás xestións administrativas de tráfico e outro rexente dun concesionario.

Outro dos elementos relevantes dentro da organización era o dos funcionarios públicos, un deles do SEPE e tres da Dirección Xeral do Servizo Público de Emprego da Comunidade de Madrid.

Estes facían uso das súas credenciais para acceder ás bases de datos do SEPE e realizar consultas diarias acerca dos expedientes da trama e os seus beneficiarios.

Desta maneira, incide a Policía, controlaban os trámites de principio ata o momento do aboamento da axuda e, a cambio, recibían ata 50.000 euros mensuais dos xefes da organización.

Noutra parte estaban os empregados das entidades bancarias, que abrían as contas en que os beneficiarios recibían as prestacións ilícitas e se aseguraban de que a rede percibise as cantidades acordadas mediante retencións de saldo ou ordes de pago diferidas.

Rexistros en 16 domicilios con abundante material apresado

Os investigadores culminaron a operación co rexistro de 16 domicilios, en que interviñeron equipos informáticos, dispositivos móbiles, reloxos de alta gama, máis de 25.000 euros en efectivo, catro vehículos e abundante documentación.

Os 25 detidos foron postos á disposición da autoridade xudicial como supostos autor de delitos contra a Seguridade Social, falsidade documental, suborno, revelación de segredos, branqueo de capitais e integración en organización criminal.