1.500 seguidores da mobilidade sostible asaltaron as rúas da Coruña no regreso do Día da Bicicleta

A Coruña recuperou o Día da Bicicleta despois de 15 anos sen celebrarse. Unha marcha sen ánimo competitivo e para a que se inscribiron 1500 persoas. Participaron familias enteiras, ciclistas de todas as idades e procedentes de ata 10 países diferentes.

O pelotón percorreu 12 quilómetros polo paseo marítimo: dende a saída no Parrote ata o estadio de Riazor, pasando pola Torre de Hércules, en camiño de ida e volta.

A Asociación Galega de Xornalistas do Deporte recuperou a celebración desta cita lúdica para promover a bicicleta como medio de transporte saudable e sostible e tamén para fomentar o turismo. 

"Fixémolo este ano como proba piloto na Coruña, pero dende AGAXORDE queremos levalo a outras cidades e vilas de Galicia", comenta Álex Centeno, presidente da Asociación Galega de Xornalistas do Deporte.

Todos os participantes chegaron ao mesmo tempo, case dúas horas despois e logo de varias paradas de reagrupamento. Porque o obxectivo era gozar do camiño, non só completalo.

Exposición sobre a historia do ciclismo

Acompañou á marcha a primeira exposición sobre a historia do ciclismo na Coruña, que comeza en 1889. Unha mostra comisariada polo xornalista Lois Novo, e na que atopamos presente e pasado dun protagonista de peso, Raúl Rey, quen foi presidente fundador do Cub Cliclista Coruñés Leyma.

"O primeiro en España que fixo un Día da bicicleta foi o Club ciclista coruñés con saída e chegada en María Pita dando a volta a toda a Coruña, hai xa máis de 40 anos", comenta Raúl Rey, expresidente do Club Ciclista Coruñés.

Historia sobre dúas rodas que se seguirá escribindo nas rúas.