Catorce familias de Valdeorras recibiron as axudas da Xunta polos danos dos incendios do verán nas vivendas

A Xunta de Galicia xa concedeu 1,1 millóns de euros en catorce axudas para paliar os danos rexistrados en vivendas durante os incendios forestais deste verán na comarca de Valdeorras, tal e como avanzou hoxe a conselleira de Medio Ambiente, Territorio e Vivenda, Ángeles Vázquez, nunha reunión con propietarios de inmobles afectados.

En concreto, Vázquez destacou que o departamento recibiu polo momento 39 solicitudes, unha cifra aínda sen pechar, xa que o prazo para presentación de solicitudes finaliza o próximo 2 de novembro. O departamento autonómico, segundo explicou, sufragará "o 100 % do valor de reposición en caso de ruína da residencia habitual e de instalacións complementarias", así como das vivendas no caso de que sexa posible a súa reparación ou rehabilitación (ata un máximo de 122.400 euros).

No que respecta a as residencias non habituais, as axudas abarcarán ata os 61.200 euros. Quedan fóra das axudas os inmobles en estado ruinoso ou abandonados antes dos incendios. A maiores, a Xunta contempla axudas por danos do enxoval doméstico cun 100 % dos gastos de reposición ata 15.000 euros, cando sexa vivenda habitual, e dun 50 % cun límite de 5.000 euros, cando sexa ocasional.

Nos demais supostos, establecerá límite que vai dos 3.000 aos 7.000 euros en función de que o enxoval sexa o da vivenda habitual e permanente ou ocasional. Esta orde de axudas conta cun financiamento inicial de 3,2 millóns de euros para o período 2022-2024, que podería incrementarse en caso de ser necesario.

"Ata o de agora temos un total de 39 solicitudes das que 14 xa as temos pagadas a día de hoxe. 10 pagáronse a semana pasada e a 4 fíxoselle o ingreso esta mesma semana. Queríamos axilidade porque a xente precisa volver ás súas casas", dixo Ángeles Vázquez, conselleira de Vivenda.