San Simón Fiddle, un campamento de verán en que os violíns fan bailar
A duodécima edición ten lugar na Illa de San Simón entre o 3 e o 9 de xullo
A illa de San Simón, na ría de Vigo, acolle dende o 3 ao 9 de xullo a 12.ª edición do San Simón Fiddle, un campamento musical de verán en que os protagonistas son nenos, adolescentes e instrumentos que van dende o violín ao cello, pasando polas pandeiretas ou as cunchas. Nesta edición hai tamén cabida para a música cajun de Luisiana, un xénero singular que conxugará con melodías que poden ir dende Bach a Bad Bunny pasando por Rosa de Moscoso.
O Sas Simón Fiddle (SSFC) é un curso de música especialmente destinado a nenos e nenas, en que se combinan actividades musicais con outras de lecer e tempo libre. O curso está destinado a aqueles alumnos que teñan como mínimo un ano de coñecemento do instrumento. Non obstante, coa intención de ofrecer a posibilidade de ter un primeiro achegamento ao violín tradicional, o SSFC abrirá un grupo destinado a principiantes en que non será imprescindible ter coñecemento ningún do instrumento.
