10 anos de cadea para un profesor que violou a unha alumna, que se suicidou, e abusou doutras 3

A Audiencia Provincial de Madrid condenou a dez anos e medio de cárcere un profesor de matemáticas de 4º da ESO dun instituto de Villanueva del Pardillo que en 2019 abusou sexualmente de tres alumnas e violou a outra, á que causou tal deterioración psicolóxica que esta suicidouse.

Ademais da pena de prisión, a Sección Décimo Quinta do tribunal madrileño impuxo a Enrique Antonio S. D. -de nacionalidade española e con antecedentes penais cancelados por abuso sexual- 59.000 euros en indemnizacións e 10.080 de multa, alén doutras medidas como a prohibición de aproximarse ás vítimas.

A vítima da violación tivo oito ingresos hospitalarios antes de suicidarse 

A sentenza detalla os múltiples e graves danos psicolóxicos que o profesor causou á alumna á que agrediu sexualmente, quen por mor do episodio sufrido tivo oito ingresos hospitalarios nun ano e, a pesar do seu intento por refacer a súa vida, acabou suicidándose en agosto de 2025.

A Sala considera probados os feitos relatados polas catro vítimas, que describiron os comportamentos e comentarios inadecuados do profesor na aula, mensaxes a través da plataforma virtual da que dispoñía o instituto para comunicarse e, en encontros privados, tocamentos e bicos a algunhas delas.

O feito máis grave, segundo relata a sentenza, produciuse nun deses encontros privados cunha das menores, dentro da aula, onde o docente chegou a violar a vítima.

Como consecuencia destes feitos, esta sufriu un trastorno adaptativo con síntomas de ansiedade e depresión e trastorno de personalidade, como acreditaron as probas periciais psicolóxicas e psiquiátricas.

A sentenza sinala que, despois do sucedido, a menor tiña pesadelos, non podía durmir nin levar unha vida normal, non saía do seu cuarto, deixou de comer e de beber e ingresou nun centro por consello da súa psicóloga.

A menor violada cambiou de colexio e de nome

A moza cambiou de centro de estudos e de nome, xa que relacionaba este coa agresión sufrida porque o seu profesor o repetía mentres a violaba.

Despois de "sucesivos e múltiples ingresos hospitalarios" -oito só no ano posterior aos feitos- e tras manifestar ás súas familias a "imposibilidade de seguir adiante tras os feitos padecidos", acabou coa súa vida en agosto de 2025, reza a resolución.

A Sala dá por probados, "sen ningún xénero de dúbidas", os feitos relatados polas vítimas, cuxas declaracións "se corroboran unhas a outras" ao describir o 'modus operandi' do procesado e son coherentes co resto de probas, como as declaracións do persoal do instituto ou os informes psicolóxicos e psquiátricos da vítima.

A Sala non considerou verosímil a versión do profesor 

Non así a versión do acusado, quen no xuízo negou os feitos e chegou a dicir que "ían por el", coma se houbese unha especie de complot contra el, teoría que "non resulta verosímil nin apta para desvirtuar o conxunto incriminatorio existente", segundo determinou a Sala.

O tribunal aplicou dúas atenuantes: de reparación do dano -o condenado xa consignou ante a Sala 26.000 euros que o Ministerio Fiscal solicitara como responsabilidade civil- e de dilacións indebidas, xa que o procedemento se incoou en 2020 e non se celebrou o xuízo ata 2026.

Con todo isto en conta, a Audiencia Provincial condenou a Enrique Antonio S. D. a nove anos de prisión pola agresión sexual a unha das alumnas e a outro ano e medio de cárcere polo abuso a outra vítima, mentres que impuxo 5.040 euros de multa por cada un dos abusos ás outras dúas menores, 10.080 euros en total.

17 anos de liberdade vixiada para o acusado 

Ademais, impuxo ao condenado en total 17 anos de liberdade vixiada, 25 e medio de inhabilitación para calquera profesión que implique contacto con menores e a prohibición de achegarse ás vítimas por dous anos en cada caso agás para a menor á que violou, para a que o período ascende a 15 anos e esténdese, ademais do lugar onde descansan os seus restos, aos seus pais.

E fixou unha indemnización de 50.000 euros para a familia da vítima falecida, 5.000 para outra das vítimas e 2.000 para cada unha das dúas restantes.