Francia aproba a prohibición de redes sociais para menores de 15 anos, pioneira en Europa

O Parlamento francés aprobou este martes de forma definitiva a lei que prohibe o acceso ás redes sociais aos menores de 15 anos, unha medida que converte a Francia no primeiro país de Europa en establecer unha restrición xeral deste tipo, que o Goberno aspira a aplicar desde o inicio do próximo curso escolar.

"Francia abre o camiño en Europa para protexer os nosos nenos e adolescentes. Seguimos adiante", declarou o presidente francés Emmanuel Macron nun vídeo nas súas redes sociais pouco despois da aprobación definitiva do texto, no que celebrou a decisión do Parlamento e lembrou que se trataba dun dos seus compromisos, que ve a luz na recta final do seu segundo e último mandato.

"Comprometinme a iso e agora xa está aprobado: as redes sociais estarán prohibidas para os menores de 15 anos desde o inicio do curso escolar", escribiu ao compartir o vídeo na rede social X.

O xefe do Estado agradeceu o apoio dos parlamentarios e sinalou que agora corresponde ao Consello Constitucional pronunciarse sobre a lei antes da súa aplicación. "Despois, será o momento de actuar para facer efectiva esta medida e protexer os nosos fillos en Internet", engadiu.

O texto recibiu o apoio do Senado, que o aprobou por 243 votos a favor e dous en contra, e horas máis tarde foi ratificado pola Asemblea Nacional, con 279 a favor e 81 en contra, culminando con iso varios meses de tramitación parlamentaria.

A norma establece que os menores de 15 anos non poderán acceder aos servizos de redes sociais ofrecidos por plataformas dixitais.

Quedan excluídos da prohibición determinados portais, como as enciclopedias en liña, como Wikipedia, e mais as plataformas de desenvolvemento e distribución de software libre ou os proxectos educativos de código aberto.

A lei non fixa un sistema concreto de verificación de idade, así que corresponderá ás plataformas como Facebook ou TikTok implantaren mecanismos para comprobar a idade dos seus usuarios.

O texto tamén amplía a prohibición do uso de teléfonos móbiles aos institutos e estende unha restrición que ata o de agora se aplicaba ás escolas de primaria e secundaria, aínda que os centros poderán prever excepcións nos seus regulamentos internos.

O Goberno prevé que a prohibición entre en vigor o 1 de setembro para as novas contas creadas nas plataformas afectadas. No caso das contas xa existentes, a medida comezará a aplicarse tras un período transitorio de catro meses, a partir do 1 de xaneiro de 2027.

A ministra delegada de Asuntos Dixitais, Anne Le Hénanff, afirmou ante o Senado que Francia é pioneira en Europa ao establecer unha maioría dixital de 15 anos e asegurou que unha coalición de quince países europeos, entre eles España, estuda incorporar unha regulación similar ás súas lexislacións nacionais.

Australia foi o primeiro país do mundo en aprobar unha restrición similar, pero no seu caso, para os menores de 16 anos.