"Toque de queda" en Barbadás nas pistas deportivas para evitar ruídos e vandalismo de noite
Multas de entre 1.200 e 3.000 euros por incumprir os horarios de peche das pistas deportivas en Barbadás
As restricións horarias son a resposta do Concello ás queixas dos veciños por ruídos e vandalismo nas zonas exteriores
Non se poden usar as pistas deportivas de Barbadás entre as 23:00 horas e as 9:00 horas
En Barbadás, Ourense, ante o aumento das queixas dos veciños polo exceso de ruído nocturno nas zonas exteriores, como parques e pistas deportivas, o Concello decide establecer uns horarios de uso das instalacións ao aire libre. Non cumprir esas restricións nos horarios pode implicar multas económicas.
Sobre o papel si, pero na práctica ás veces non resulta doado dar co equilibrio entre garantir o descanso nocturno dos veciños e permitir momentos de lecer en espazos públicos, ao aire libre, de noite. Buscan ese equilibrio en Barbadás, Ourense. Hai queixas dos veciños por ruídos, de noite, de xente que se xunta nas pistas deportivas.
O Concello decide establecer unha especie de toque de queda nas pistas de deporte, parques e xardíns. Establecer uns horarios de uso. A partir das once da noite, nas rúas, silencio, ou, polo menos, facer o menor ruído posible. Ás nove da mañá, permítese de novo a actividade. De once da noite a nove da mañá, descanso.
O Concello de Barbadás di que non será especialmente rigoroso nas sancións por incumprir estes horarios pero, advirte, as multas por non respectar as restricións horarias van dos mil aos tres mil euros.
