"Sirât" leva dous premios Feroz na gran noite para o filme "Los domingos"
A fita de Oliver Laxe acadou dous dos sete galardóns aos que optaba: mellor tráiler e mellor música orixinal
O traballo da directora vasca Alauda Ruíz de Azúa gañou cinco premios, entre eles, á mellor película dramática
Canto ás series, as grandes triunfadoras foron Poquita fe e Yakarta, con tres estatuíñas cada unha
Oliver Laxe recolle o premio á mellor música orixinal. EFE/Lavandeira Jr.
Los domingos, dirixida por Alauda Ruíz de Azúa, foi a gran triunfadora desta noite na décima terceira edición dos Premios Feroz, que se entregaron no Pazo da Cultura de Pontevedra.
A fita da realizadora vasca gañou cinco premios: mellor película dramática, mellor dirección, mellor guión, mellor actriz protagonista para Patricia López Arnaiz e mellor actriz de elenco para Nagore Aramburu.
"Isto é unha miragre, sintoo así", afirmou a directora, que lembrou que as películas "non se fan soas, senón que se fan cos equipos". Na súa gran noite, Alauda Ruíz de Azúa fíxolles un chamamento aos espectadores para que vaian ao cine.
A gala deixou un sabor agridoce para Sirât, de Óliver Laxe, que quedou sen os grandes premios e recibiu só dous dos sete galardóns aos que optaba: mellor tráiler e mellor música orixinal.
Foi o propio director dos Ancares -nominado aos Goya e con dúas candidaturas para os Óscar- o que subiu para recoller este último premio.
🎶 El músico y compositor Kangding Ray se alza con el premio Feroz a la mejor música original por ‘Sirât’, recoge el premio , el directo, Oliver Laxe #Feroz2026 pic.twitter.com/zCiy2h4NDq
— Premios Feroz (@PremiosFeroz) January 24, 2026
Maspalomas, outra das películas que chegaba con máis opcións, fíxose con dous premios das grandes categorías de interpretación: mellor actor protagonista para José Ramón Soroiz e mellor actor de elenco para Kandido Uranga.
La cena gañou na categoría de mellor película de comedia, desbancando á galega "Rondallas".
Canto ás series, Yakarta levou o premio a mellor serie dramática, ao mellor guión de serie e a mellor actor protagonista para Javier Cámara. O vigués, Fran Araujo, produtor e guionista de Movistar, forma parte do equipo da serie.
🤍 Javier Cámara se alza con el premio Feroz al mejor actor protagonista de una serie por ‘Yakarta’ #Feroz2026 pic.twitter.com/wO3TxTczHT
— Premios Feroz (@PremiosFeroz) January 24, 2026
Poquita fe fíxose con tres das seis estatuíñas ás que optaba: mellor serie de comedia, mellor actriz protagonista para Esperanza Pedreño e mellor actriz de elenco para Julia de Castro. O premio a mellor actor de elenco dunha serie foi para Secun de la Rosa por Superestar.
