Galicia afronta a folga no transporte de pasaxeiros para reclamar os convenios

Galicia afronta este venres unha xornada de folga no transporte de pasaxeiros para reclamar novos convenios colectivos nas catro provincias. Os sindicatos convocantes CIG, CCOO e UXT denuncian uns servizos mínimos abusivos e lembran que o principal motivo da folga é a protesta pola paralización na negociación dos catro convenios provinciais.

Segundo fontes sindicais, os convenios seguen sen avanzar na Coruña, Ourense e Pontevedra, mentres que en Lugo nin sequera se convocan xuntanzas. Outras razóns para convocar o paro son a denuncia da situación precaria do sector e os problemas de seguridade nos autobuses.

Os sindicatos explican que a patronal ofrece unha suba salarial dun 0,8 % —o IPC subiu en Galicia un 6,4 % entre xaneiro de 2022 e xaneiro de 2023— sen cláusulas que garantan o mantemento do poder adquisitivo. Tampouco quere entrar a negociar ningunha mellora relativa á xornada ou ás condicións laborais e sociais dos cadros de persoal.

CIG, CCOO e UXT acusan a Xunta de precarizar o sector pola deterioración nas condicións de traballo e do servizo, como algo derivado dos contratos licitados polas consellerías de Mobilidade e Educación nos últimos anos, infradotados de orzamento.

Os sindicatos tamén cuestionan a situación da flota de vehículos ao observar que de xeito xeral non está en bo estado, con autobuses antigos, sen mantemento axeitado nalgúns casos e con avarías. Din que a antigüidade dos vehículos é, en ocasións, superior á esixida nos contratos da Xunta, polo que instan a unha inspección.

A folga ten lugar xusto antes das festas da Semana Santa, e tamén en plena polémica desde que o Tribunal Superior de Xustiza de Galicia solicitou a Competencia que sancione a Monbus e Alsa por "indicios de repartir o mercado".