'Los domingos' triunfa nuns Goya en que 'Sirat' arrasa no eido técnico

A triunfadora da cuadraxésima edición dos Goya foi Los domingos, de Alauda Ruiz de Azúa, ao alzarse co premio a mellor película, mellor dirección e guión orixinal. Sirat, do director franco-galego Oliver Laxe, levou seis de carácter técnico.

Nunha gala na que Susan Sarandon recibiu o Goya Internacional, a película da realizadora vasca, a cuarta muller en levar o premio a mellor dirección, acadou ademais os galardóns de mellor actriz para Patricia López Arnáiz, e de mellor actriz de elenco para Nagore Aramburu.

O filme, que relata a historia dunha moza que quere entrar nun convento, gañou cinco dos trece galardóns aos que optaba.

Seis premios técnicos

Pola súa banda, a cinta de Oliver Laxe sobre un pai que busca a filla nas raves de Marrocos, candidata a dous premios Oscar, vaise con seis dos once Goyas aos que aspiraba, todos no eido técnico.

Conseguiu o de mellor música orixinal (Kangding Ray); son (as tamén candidatas ao premio de Hollywood Amanda Villavieja, Laia Casanovas e Yasmina Praderías); dirección de produción (Oriol Maymó); fotografía (Mauro Herce); montaxe (Cristóbal Fernández) e dirección de arte (Laia Ateca).

Mellor actor sen sorpresas

Nos premios principais de interpretación non houbo sorpresas. O de mellor actor foi para José Ramón Soroiz por Maspalomas, no papel dun home maior que debe volver ao armario ao entrar nunha residencia de anciáns. O seu nome soaba con forza.

Pola súa banda, La cena alzouse co premio a mellor guión adaptado a partir da comedia teatral de José Luis Alonso de Santos sobre un grupo de presos republicanos obrigados a preparar unha cea para Franco e os seus xenerais en plena posguerra.

O filme de Manuel Gómez Pereira tamén conseguiu o de mellor deseño de vestiario.

Primeira actriz xorda galardonada

A quinta candidata a mellor película, ademáis das mencionadas, era Sorda, que levou outros tres Goyas: mellor dirección novel para Eva Libertad; mellor actor de elenco para Álvaro Cervantes; e actriz revelación para a irmá da directora, Miriam Garlo, primeira actriz xorda en lograr este galardón en España.

O cineasta catalán Albert Serra gañou o seu primeiro Goya polo mellor documental coa cinta Tardes de soledad, en que retrata a vida íntima e profesional do toureiro Andrés Roca Rey.

Arrebatoullo a Flores para Antonio que conseguiu o premio á mellor canción, recollido por Alba Flores.

Actor revelación

O de mellor actor revelación foi para o mozo Toni Fernández Gabarre polo seu papel en Ciudad sin sueño que retrata a dura realidade do barrio marxinal da Cañada Real de Madrid.

El cautivo, de Alejandro Amenábar, gañou o Goya a mellor maquillaxe e salón de peiteado; e Los tigres, de Alberto Rodríguez, conseguiu o de mellores efectos especiais.

Nesta edición, Valor sentimental, de Joachim Trier, conseguiu o premio a mellor película europea -outro dos nomeados, o iraniano Jafar Panahi, estaba presente na gala- mentres Belén, de Dolores Fonzi, obtivo o premio a mellor película iberoamericana.

O filme participado pola CSAG Decorado, de Alberto Vázquez, alzouse co premio a mellor película de animación.

Catro décadas de cinema español

A gala do 40 aniversario dos premios foi unha reivindicación de catro décadas de cinema español na que destacaron pola súa emoción as intervencións de Susan Sarandon, Goya Internacional, e Gonzalo Suárez, Goya de Honra.

"As películas son o último reduto co que podemos soñar espertos", asegurou o director e guionista homenaxeado.

Durante a velada celebrada no Auditorio do Centro de Convencións de Barcelona -cidade á que volveron estes premios 26 anos despois- lembraron actores míticos como Alfredo Landa, recollendo un dos seus tres premios Goya, e películas premiadas noutras edicións.

A primeira foi El viaje a ninguna parte, de Fernando Fernán Gómez, que segundo lembrou o presidente da Academia, Fernando Méndez-Leite, de 81 anos, "excedeu o seu incerto destino e segue adiante con paso firme e seguro".

O crítico de cine e realizador da TVE estivo involucrado naquela primeira gala de 1987, segundo relatou, como director do ICAA. Este sábado, dirixiuse aos máis de 3 000 asistentes por última vez no seu actual mandato á fronte da Academia.

Entre eles, ademais de membros da organización e da profesión cinematográfica, estaban o presidente do Goberno, Pedro Sánchez, e os ministros Yolanda Díaz, Ernest Urtasun, Óscar López e Jordi Hereu, e o presidente da Generalitat, Salvador Illa.

Gaza volve ser o principal foco político

A traxedia de Gaza volveu ser o principal foco de atención política, como xa fora hai un ano. As insignias en lembranza ao pobo palestino lucían en moitos dos traxes.

Tamén se distinguía con claridade no vestido de Susan Sarandon e na indumentaria dos presentadores, Rigoberta Bandini e Luís Tosar, que conduciron a gala con complicidade e humor.

A actriz estadounidense, que levantou todo o auditorio, emocionouse ao enxalzar a "lucidez moral" de España no conflito de Gaza. Chamou a mirar cara ao futuro con esperanza e a poñer no centro da vida valores como a bondade, a valentía ou a compaixón.

"Ter esperanza en tempos difíciles non só é unha actitude romántica nin lixeira, sostense en verdades esenciais", dixo a intérprete de 'Thelma e Louise' parafraseando o historiador estadounidense Howard Zinn.

As apelacións contra a violencia, que non tiveron máis que referencias veladas no que se refire ao bombardeo de Irán, si se concretaron sobre Ucraína ou a condena á persecución de migrantes nos Estados Unidos.

Esta é a listaxe completa dos galardóns desta edición número corenta dos premios Goya:

MELLOR PELÍCULA:

Los domingos, de Alauda Ruiz de Azúa.

MELLOR DIRECCIÓN:

Alauda Ruiz de Azúa, por Los domingos.

MELLOR ACTOR PROTAGONISTA:

Jose Ramón Soroiz, por Maspalomas.

MELLOR ACTRIZ PROTAGONISTA:

Patricia López Arnaiz, por Los domingos.

MELLOR ACTOR DE ELENCO:

Álvaro Cervantes, por Sorda.

MELLOR ACTRIZ DE ELENCO:

Nagore Aranburu, por Los domingos.

MELLOR DIRECCIÓN NOVEL:

Eva Libertad, por Sorda.

MELLOR GUIÓN ORIXINAL:

Alauda Ruiz de Azúa, por Los domingos.

MELLOR GUIÓN ADAPTADO:

Joaquín Oristrell, Manuel Gómez Pereira e Yolanda García Serrano, por La cena.

MELLOR MÚSICA ORIXINAL:

Kangding Ray, por Sirat.

MELLOR CANCIÓN ORIXINAL:

"Flores para Antonio", de Alba Flores e Silvia Pérez Cruz, por Flores para Antonio.

MELLOR PELÍCULA DE ANIMACIÓN:

Decorado, do galego Alberto Vázquez (participada pola CSAG).

MELLOR PELÍCULA DOCUMENTAL:

Tardes de soledad, de Albert Serra.

MELLOR PELÍCULA IBEROAMERICANA:

Belén, de Dolores Fonzi (Arxentina).

MELLOR PELÍCULA EUROPEA:

Valor sentimental, de Joachim Trier (Noruega).

MELLOR ACTOR REVELACIÓN:

Antonio "Toni" Fernández Gabarre, por Ciudad sin sueño.

MELLOR ACTRIZ REVELACIÓN:

Miriam Garlo, por Sorda.

MELLOR DIRECCIÓN DE PRODUCIÓN:

Oriol Maymó, por Sirat.

MELLOR DIRECCIÓN DE FOTOGRAFÍA:

Mauro Herce, por Sirat.

MELLOR MONTAXE:

Cristóbal Fernández, por Sirat.

MELLOR DIRECCIÓN DE ARTE:

Laia Ateca Font, por Sirat.

MELLOR DESEÑO DE VESTIARIO:

Helena Sanchís, por La cena.

MELLOR MAQUILLAXE E SALÓN DE PEITEADO:

Ana López-Puigcerver, Belén López Puigcerver e Nacho Díaz, por El cautivo.

MELLOR SON:

Amanda Villavieja, Laia Casanovas e Yasmina Praderas, por Sirat.

MELLORES EFECTOS ESPECIAIS:

Paula Gallifa e Ana Rubio, por Los tigres.

MELLOR CURTAMETRAXE DE FICCIÓN:

Ángulo muerto, de Cristian Beteta.

MELLOR CURTAMETRAXE DOCUMENTAL:

El santo, de Carlo D'Ursi.

​MELLOR CURTAMETRAXE DE ANIMACIÓN:

Gilbert de Alez Salu, Arturo Lacal e Jordi Jiménez.

GOYA INTERNACIONAL:

Susan Sarandon.

GOYA DE HONRA:

Gonzalo Suárez.