"Está entrando auga. Temos medo", o berro de auxilio dos mariñeiros do Villa de Nores

Os mariñeiros do Villa de Nores, pesqueiro irmán do Villa de Pitanxo, denuncian unhas condicións de seguridade pésimas no buque que está a traballar en augas de Terra Nova. O engraxador do barco confirmáballes a distintos medios que tiñan unha vía de auga, que nun primeiro momento lograron controlar pero temen que abra outra vez.

A bordo do buque hai 29 tripulantes que denuncian as condicións de inseguridade nas que se atopan.

Un deles falaba este sábado co xornal Faro de Vigo e dicía que a armadora sabe o que están vivindo e, aínda así, dinlles que sigan traballando con normalidade.

Relatan que tiveron que pechar as portas con cadeados para impedir a entrada de auga. Segundo os voceiros dos familiares das vítimas do Villa de Pitanxo a Consellería do Mar explica que Salvamento Marítimo Madrid xa se puxo en contacto co armador e que este negou calquera tipo de problema de seguridade no barco.