Chega a ponte do 'six-seven', a última expresión xuvenil que ninguén sabe que significa
O termo converteuse en popular porque se fixo viral a partir dun vídeo en Internet
A linguaxe das novas xeracións nútrese cada vez máis de palabras creadas nas redes sociais
Será con algo de chuvia, seguro, pero chega unha ponte festiva que sempre senta ben, sexa como sexa. Para algúns é a da Inmaculada, a festa impulsada no século XV; para outros, a da Constitución, que celebra o texto de 1978; pero agora algúns xa lle din tamén a da six-seven e non é só porque caia en 6, 7 e 8. Six-seven é, para moitos, a expresión do ano. Sobre todo, para as novas xeracións.
"Estás cos rapaces no patio e, de súpeto, ves que están: «Six-seven! Six-seven! Six-Seven!»", conta un mestre de colexio.
"Hai un vídeo viral dun rapaz... Aínda non o entendo pero si que o teño visto bastante, sobre todo por Tik-tok", confirma unha moza.
"Si que o escoitei pero o primeiro que non o entende son eu", admite outro rapaz.
O certo é que o significado da expresión non está nada claro. Hai distintas interpretacións. E tampouco se puido identificar indiscutiblemente a súa orixe. Si se sabe que se fixo popular porque aparece nun vídeo que triunfa en Internet.
É un fenómeno rechamante: a expresión é popular porque se fixo viral; non se fixo viral porque antes fose coñecida. Así, six-seven, entrou no vocabulario da xente nova que, con frecuencia, sobre todo a través das redes sociais, emprega termos inéditos e descoñecidos para outra gran parte da poboación: "funar", "random", "PEC", "dospa" ou "frontear".
"FOMO, o medo a perder a experiencia", pon como exemplo unha moza. "NPC, cando unha persoa non fai nada ou é moi simple", apunta outra.
"Cringe?", pregúntalle un pai ao seu fillo de dez anos. "Cando algo che dá moita vergoña", explícalle o neno. "E así todo o día...", suspira cun sorriso o home.
A listaxe medra con cada mensaxe. Algunhas destas palabras poderían acabar sendo asumidas nos dicionarios. Non sería a primeira vez. En six-seven anos, quen sabe.
