Un acoitelamento múltiple en Dublin provoca disturbios de grupos de extrema dereita
Un acoitelamento múltiple en Dublin provoca disturbios de grupos de extrema dereita
Un home, xa detido, acoitelou catro persoas, tres delas menores
O acoitelamento de catro persoas este xoves en Dublín, tres delas menores, provocou disturbios na cidade en que grupos de extrema dereita atacaron a policía irlandesa, a Garda Irlandesa.
O máximo responsable da Garda Drew Harris explicou que un número de axentes foi atacado con fogos artificiais, botellas e outros obxectos na zona onde un home acoitelou este xoves unha muller e tres menores. Un dos tres menores, unha nena de cinco anos, atópase en estado grave.
O dirixente policial cualificou estas protestas de "vergoñosas" e asegurou que están impulsadas por "unha facción de vándalos" de "ideoloxía de extrema dereita". Harris pediu á cidadanía que ignore "os rumores" que circulan na redes sociais sobre a identidade do atacante, xa que se trata de "información malintencionada" diseminada por grupos "para os seus propios fins".
A Garda informou este xoves de que o ataque con arma branca ocorrido no centro de Dublín "non está relacionado co terrorismo" e que podería tratarse dun feito "illado".
Nunha comparecencia ante os medios, o superintendente da Garda Liam Geraghty indicou que a investigación trata agora de establecer os motivos polos que un home duns 50 anos, detido no mesmo lugar do ataque, acoitelou as catro persoas e despois se feriu. O lugar do ataque é unha zona moi transitada do norte da capital e próxima a unha gardería.