Morre un home de avanzada idade tras sufrir unha caída cando podaba unha árbore en Barbadás
O corpo, que quedou atrapado tras caer desde unha altura duns dous metros, tivo que ser liberado polos efectivos de emerxencia
Un home de avanzada idade faleceu este luns ao caer dunha árbore cando realizaba labores de poda cunha motoserra nunha leira situada na rúa da Hermida, en Betrances, no municipio ourensán de Barbadás.
Fontes do operativo informaron de que o suceso tivo lugar contra as 12:30 horas deste luns.
Os efectivos de emerxencia tiveron que excarcerar o corpo, que quedou atrapado entre a árbore e a parede dun galiñeiro, tras caer desde unha altura duns dous metros.
Pola súa banda, o CIAE 112 Galicia explicou que nos labores participaron efectivos do Servizo Municipal de Protección Civil de Barbadás, Urxencias Sanitarias de Galicia-061, Garda Civil e Policía Local.
