Mariscadores de Ferrol invisten máis de dúas horas ao día en retirar residuos dos seus aparellos

Á media mañá chegaba de pescar o Cabo Prior Un ao porto de Ferrol. E traía os seus aparellos cheos de restos de toalliñas de bebés e doutros obxectos de uso cotián.

"E tardamos horas e horas todos os días en limpar os aparellos que, ao ter os residuos xa non pescan igual. E moitos, rompen", explica Ignacio Granda, o patrón do Cabo Prior Un.

Arredor dunha trintena de barcos estanse a ver afectados desde que comezou a campaña da centola. Son os barcos que pescan en augas do porto exterior, Chanteiro ou Sueiro.

Os mariscadores sospeitan que a orixe deste problema está nalgún emisario dalgunha depuradora que hai na costa. 

"Xa lle trasladei o informe da situación á Consellería de Pesca e ao Concello de Ferrol. Hai que buscar a orixe do problema para intentar dar coa solución", di o patrón maior da confraría de Ferrol, Gustavo Chacartegui.

Porque aseguran que esta non é a primeira vez que sofren este problema.