Forman sobre violencia de xénero máis de 150 integrantes das forzas de seguridade

Pasan lista as Forzas e Corpos de Seguridade do Estado. Os que nos protexen amplían a súa formación sobre violencia de xénero. En Galicia hai 4.700 casos activos no sistema VioGén e preto de 1.300 homes son agresores reincidentes.

"As mulleres non teñen garantidos os dereitos máis básicos que son o dereito á vida e á integridade física e psíquica. Unha vida cun mínimo de calidade, vivir sen medo a ser asaltada, agredida ou asasinada", sinala Ana Aba Catoira, decana da Facultade de Dereito da Coruña.

Penas de afastamento e o uso de dispositivos de control telemático son hoxe as medidas máis implementadas para protexer ás vítimas.

"A importancia dos medios telemáticos, a importancia de que as mulleres o teñan á súa disposición e a importancia de protexer tamén os dereitos dos presos aos que se lles pon esa pulseira", explica María Debén Alfonso, xefa da Unidade de Coordinación contra a violencia sobre a muller da Delegación do Goberno en Galicia.

230 mulleres viven hoxe en Galicia cun dispositivo telemático e outras 700 que dispoñen de atención telefónica e localización 24 horas.

"Cando ingresa co dispositivo dende o centro penitenciario ofícianse os trámites para a súa desinstalación e retirada e pídese información de cal é o órgano xudicial competente para saber como proceder no caso de excarceración do interno. Despois cando se procede á excarceración dese interno xeralmente faise en sede xudicial a súa desinstalación de cara á liberdade", explica José Ángel Vázquez Yáñez, director do Centro Penitenciario de Teixeiro.

Con todo, sinalan que a batalla conta a violencia de xénero debe comezar dende a base, loitando contra a discriminación e educando en igualdade.