Usar un paraugas para estar na misa; a chuvia cóase dentro da igrexa de Entrimo

A impoñente igrexa de Santa María a Real está en Entrimo, o concello máis chuvioso da provincia de Ourense: 444 litros por metro cadrado caeron en só dúas semanas de novembro.

"A imaxe fala por si soa: temos que poñer plásticos, baleirar caldeiros de auga...", sinala unha veciña.

Desde hai uns 3 anos, a chuvia empezou a filtrarse ao interior. Primeiro polo cimborrio e agora, din, xa chove á feito. "Pola cúpula, pola lanterna, polo frontal... Por case toda a igrexa", aclara outro veciño.

Tiveron que quitar as alfombras e substituílas por plásticos e caldeiros. "Cada vez quitamos máis caldeiros e acabamos por poñer plásticos por riba dos bancos, porque a xente xa tiña que usar un paraugas para estar na misa", di unha freguesa.

Leva máis dunha semana sen caer unha pinga, pero nalgunhas zonas, como a torre do campanario, segue chorreando.

"Na parte da ventá, incluso, case temos un xardín. Entra tanta auga que empezan a crecer herbas dentro da igrexa", lamenta Ramiro López, párroco de Entrimo.

Unha das preocupacións que teñen os veciños e mailo párroco é que a humidade deteriore os pintorescos retablos que adornan o altar central e os laterais da igrexa. Hai que lembrar que se trata dun templo declarado Ben de Interese Cultural polo seu valor artístico.

O orzamento que se presupostara inicialmente para a reparación xa quedou obsoleto e os veciños temen que se sigan atrasando as obras, que precisan o visto e prace de Patrimonio.