A Xunta urxe o Goberno a dar prazos fiables para a chegada dos trens Avril

As infraestruturas da nova mobilidade avanzan en Galicia. A estación intermodal da Coruña súmase ás que xa están en servizo en Santiago, Ourense e Vigo. Pero a alta velocidade aínda non é real á espera dos trens Avril que permitirán reducir os tempos de viaxe.

A Xunta de Galicia urxe do Goberno prazos fiables para a chegada das novas unidades despois dos sucesivos atrasos.

"Todas as datas oficiais ata agora incumpríronse. Preocúpanos cando e tamén cantos trens Avril veñen a Galicia. Nós fixemos un estudo que detalla que precisamos sete unidades", di Ethel Vázquez, conselleira de Infraestruturas e Mobilidade.

A Xunta tamén reclama avances na modernización da liña ferroviaria entre A Coruña e Ferrol e no plan director do Corredor de Mercadorías para dar resposta ás necesidades das empresas.

"É fundamental para a competitividade de Galicia. Pero tamén para que os galegos poidamos utilizar medios como os doutros territorios e que os trens Avril nos permitan estar en Madrid nun tempo razoable", asegura Jorge Cebreiros, presidente da Confederación de Empresarios de Pontevedra.

O último prazo fixado polo Goberno para a chegada dos Avril apunta ao primeiro trimestre de 2024, dous anos despois do inicialmente previsto.