Xincana en Lugo para atopar 50 décimos do sorteo de Nadal agochados pola cidade
Un loteiro agocha desde hoxe ata o domingo uns 50 décimos para regalarlles aos veciños que os atopen
Unha iniciativa que xurdiu tras a pandemia para que os veciños recuperasen a ilusión tras as restricións e que hoxe é xa unha tradición
En Lugo arrancou a xincana na busca de décimos de lotaría pola cidade. Un loteiro agocha desde hoxe ata o domingo uns 50 décimos para regalarlles aos veciños que os atopen. Este ano os 50 boletos estarán repartidos só polo barrio de San Antonio, onde xurdiu a iniciativa.
"É doado porque nas pistas hai edificios e casas emblemáticas, o barrio da moito xogo", explica Fernando Toubes, loteiro e promotor da xincana.
Faino el mesmo cada día coa complicidade da noite. A iniciativa atrae a grandes e pequenos... todos queren facerse cun dos boletos.
"Está moi ben a iniciativa participan todos", conta unha muller.
Esta peculiar xincana na busca do décimo do sorteo de Nadal é xa unha tradición na cidade. A iniciativa desta libraría nacía tras a pandemia para que os veciños recuperasen a ilusión tras as restricións.
"O titulo de soño de María é porque María somos todos, cando había restricións foi ilusionante, a avoa María, a nai, a moza universitaria que estaba aquí a primeira hora en busca de pistas, non temos que esquecer de onde vimos", comenta Fernando Toubes.
A busca é intensa pero en todas as edicións sempre houbo algún que non atoparon. Eses van para as organizacións benéficas, porque xa o di o anuncia o importante da lotaría de Nadal é compartila.
