A USC quere ter en marcha o novo Centro de Ciencias da Saúde antes de catro anos
A sede albergará as facultades de Farmacia e Enfermería
Un orzamento de case 30 millóns de euros permitirá a edificación do novo Centro de Ciencias da Saúde da Universidade de Santiago. A el vanse trasladar dúas das titulacións máis emblemáticas do campus compostelán.
O proxecto presentábase este martes na sede do reitorado, no pazo compostelán de San Xerome, pero ese centro vaise construír no Campus Sur, xusto en fronte da avenida de Barcelona e moi preto co Complexo Hospitalario Universitario de Santiago.
Cóntase con ter listo xa un proxecto de execución nun prazo de dezaoito meses.
"A ver se no curso 2025-2026 tivésemos alí funcionando a Facultade de Farmacia, que é o obxectivo -como acaban de ver- número un", explicou Antonio López, reitor da USC.
A edificación vai constar de catro módulos que van albergar as facultades de Farmacia e Enfermería, e tamén laboratorios de investigación biomédica.
O proxecto destaca pola súa integración na paisaxe. Vai contar con instalacións de aerotermia, solares, fotovoltaicas e mesmo cunha central de biomasa, co obxectivo de conseguir a autosuficiencia enerxética.
